April 211, Pathianni zing khan NBA play-off 2024 khelh tan a ni a, champion lai Denver Nugget chuan an khingpui Los Angeles Lakers an hneh nghal. Inkhel dangah Minnesota Timberwolves in hnehna an chang ve bawk.
Playoff khelh khatnaah play in ah chak a, play-off khel phak hram Los Angeles Lakers in champion lai Denver Nuggets lakah bul an tan tha a, quarter khatnaah point 8 in chungnung zawkah an tang nghal. Lakers lakah bul tan tha lo mah se Nuggets an insiamtha thuai a, quarter hnihnaah point ngain an chungnung a, point thuma hnufual zawk chungin chawlhlawk an hmang.
Chawlhlawk hnu lamah Nuggets in bul an tan tha viau a, quarter thumnaah point 14 zetin an chungnung a, point 11 in an khingpuite an lehthal. Quarter hnuhnung berah chak tumin an innawr tawn nasa viau a, inkhel hmuhnawm takah point 25 ve ve an thawkchhuak a, chungnung zawk an awm thei lo.
Champion lai Nuggets hian quarter thumnaa an chetthat an chhawr tangkai a, point 114-103 in an khingpui LA Lakers an hneh. Lakers an hneh tum hian Nuggets player pawimawh Nikola Jokic chuan 32 a thawkchhuak. LA Lakers player pawimawh Anthony Davis chuan point 32 a thawkchhuak a, player ropui LeBron James pawhin point 27 thawkchhuak ve bawk mah se Denver lakah hnehna an chang zo ta chuang lo a ni.
Pathianni zinga inkhel dangah Minnesota Timberwolves chuan an khingpui Phoenix Suns chu point 120-95 in an hneh. New York Knicks point 111-104 in Philadelphia 76ers an hneh a. Cleveland Cavaliers pawhin an khingpui Orlando Magic chu point 97-83 in an hneh ve bawk.
Play-off hi game sarih khelh tur a ni a, game li la hmasa zawk zawkin hnehna an chang ang. Eastern Conference leh Western Conference-ah champion an zawng ve ve ang a. Conference champion te hian NBA play-off final an khel zui leh ang.