Aston Villa chetthatpui a, siam lian thar lehtu Unai manager Emery chuan rinawmna thu a tiam thar leh a. Villa Park-ah kum 2027 thleng cham turin contract thar a ziak.
Arsenal manager hlui Unai Emery hian November 2022 khan Aston Villa hi a enkawl tan a, hetihlai hian Premier League-ah 16-na an ni mek. Manager tawnhriat ngah Emery an rawih hnuin Villa hian hma an sawn uak uak a, 16-na daiha awm khan pasarihna ni chungin season an khar a, Europa Conference League khel turin an tling ta hial. Europa Confernce League-ah hian semi-final lut tawhin, Europe a inelna pathumah EPL club dam awmchhun an ni.
Villa-a a season hmasa ber tha taka a hman hnuin Emery hian 2023-24 season-ah hma a sawnpui leh viau. EPL-ah palina an ni mek a, champions league khelh phak ngei tumin tan an khawh mek. UCL khel phak turin an dinhmun a tha thawkhat viau tawh nghe nghe. November 2022 atanga Villa a enkawl hnuin Emery hian Premier League-ah point 115 zet a hmuhpui tawh a. Hemi chhung hian Villa aia point hmu hnem awmchhun chu Manchester City, Liverpool leh Arsenal te chiah an ni. Emery hnuaiah Villa hian game tinah point 1.9 hmu zel ang an ni a, Aston Villa manager ni tawh zawng zawng zingah record nei tha ber a ni. Inelna hrang hrangah Villa hi vawi 59 a kaihruai tawh a, vawi 35 chakin an chak zat hi 59% zet a ni nghe nghe.
“Club neitu ten an hmathlir thui tak min hrilh a, hma sawn zel turin structure tha tak an nei bawk. Club neitute nen thawhhona tha tak leh tum thuhmun kan neih hi vawn nun reng a ngai a. Ka tum ram thleng turin tha zawkin kan thawk ho zel ang. He hmuna ka cham chhunzawm zel thei tur hian min tilawm tak zet a ni,” tiin Villa a rinawm thu tiam nawn leh Emery chuan contract thar a ziah belh chungchang a sawi.