April 23, Thawhleh zana English Premier League inkhel awmchhunah London derby khelh a ni a. Arsenal chuan Emirates stadium-a an mikhual Chelsea chu 5-0 ngawtin an sawp. Arsenal hian point liin hma an hruai fal a, champion tumin hma lam an pan zel.
EPL hmahruaitu Arsenal hian team lian Chelsea, Tottenham leh Manchester United te hmachhawn an la ngaih vangin champion turin rin an har. An hmabak hautak pathum zinga pakhat chu thawhleh zan khan an paltlang phawt a, awlsam takin Chelsea an hneh. Chelsea lakah an khelh that em vangin inrintawkna sang zawk nen an inlan chhunzawm ngei dawn a, hei hi champion tura puitu tha tak a nih ngei a rinawm
Arsenal hian Emirates Stadium-a an mikhual Chelsea lakah bul an tan tha viau a, goal an thun thuai. Inkhel tan atanga minute lina lekah Leandro Trossard chuan hmahruaina goal a thun. Hma takah goal thun mah se goal dang an thun belh thei lawk lo thung a, 1-0 a hmahruai chungin chawlhlawk an hmang.
Chawlhlawk hnu lamah Arsenal an khel tha chhunzawm a, goal an thun belh leh thuai. Minute 52-naah Ben White chuan an goal hnihna a thun. Defender chetha chho tak White goal thun hnu hian Laipui a puak nawn leh thuai a. Chelsea player hlui Kai Havertz chuan minute 57-naah an goal thumna thuin an hmahruaina a ti zau. Si thum fai ngawta hma an hruai hnuin Ben White leh Kai Havertz ten goal an thun belh leh cheu a, an kawng dal theitu tura ngaih zinga mi Chelsea chu 5-0 ngawtin an sawp a, an mualah ngei point thum hlu tak an hmu. A team hlui laka goal hnih thun Havertz kha Mikel Arteta hnuaiah a vul thar leh a, Arsenal player pawimawh a ni. Chelsea-ah beisei phak lo viau mah se, Arsenal-ah erawh a vul ta viau thung.
Chelsea lakah awlsam taka point thum an hmuh hmangin Arsenal hian point liin hma an hruai fal a, champion tumin hma lam an pan. An hnuaia awm Liverpool leh Manchester City te aiin an khel tam zawk thung.