May 9, Ningani khan NBA chuan NBA 2023-24 season Most Valuable Player (MVP) dawngtu tur a puang a. Denver Nuggets player pawimawh Nikola Jokic chu a tum thum nan MVP atan thlan a ni.
2022-23 season-ah Denver Nuggers an champion theih nana thawhhlawk tak Nikola Jokic hian 2023-24 season-ah pawh a khel tha leh viau a, Denver hi play-off semi-final a hruai thleng. NBA 2023-24 regular season bikah Jokic hian Denver tan point 2,000 a thawkchhuak a, ball sawhlet vawi 900 a dawn bakah assist vawi 700 zet a nei bawk a. NBA player zingah regular season, season khatah point 2000, ball sawhlet vawi 900 zet dawng a, assists vawi 700 nei tling thei pahnihna a ni.
Regular season-ah Denver Nuggets hi Western Conference-ah pahnihna a nihpui a, Denver tan hian inkhel tinah point 26.4 thawkchhuak zel ang a ni a, inkhel tinah ball sawhlet vawi 12.4 dawng zel ang a nih bakah game tinah assist vawi kua nei zel ang a ni bawk a. 2023-24 regular season-ah hian vawi 25 zet triple-doubles a puitlin hial nghe nghe a ni. Tarlan tawh angin Denver Nugget hi play-off semi-final a hruai thleng a. Semi-final-a an khingpui Minnesota Timberwolves lakah game hnih tlawm zawnin, hnufual zawk an ni mek thung.
NBA a chawimawina ngaihhluthlawh ber dawng turin Nikola Jokic hian vote 962 a hmu a, a hnuai chiaha awm Oklahoma City player pawimawh Shai Gilgeous-Alexander chuan vote 640 a hmu a. Jokic hian a hnuai chiaha awm Gilgeous-Alexander aiin vote 322 zetin a hmu sang zawk. Dallas Maverick player pawimawh Luka Doncic chuan point 586 a hmu a, pathumnaah a awm. MVP thlangtu mi 99 zinga mi 79 zetin Jokic hi pakhatnaah an thlang a, mi 15 in Gilgeous-Alexander hi pakhataa an ziah laiin mi paliin Luka Doncic chu a chung berah an ziak ve bawk.
NBA MVP hi chanchinbumi thlanchhuah mi 100 ten vote thlakin an thlang thin a, MVP thlangtute hian player panga hming; tha an tih dan indawtin an ziak lang thin. Pakhatna hian point 10 zel an hmu a, pahnihnain point 7, pathumnain point 5, palinain point 3 leh panganain point 1 khat zel an hmu a. Point belhkhawma point hmu s^ng ber khan MVP award an dawng zui ta thin a ni.
MVP thar Nikola Jokic hi kum 2021 leh 2022 khan MVP-ah thlan a lo ni tawh bawk a, tun hi tum thum MVP a nihna a ni. NBA-ah hian MVP ni ngun ber chu Kareem Abdul-Jabbar niin vawi ruk ngawt MVP a ni tawh a, Michael Jordan leh Bill Russell te vawi nga ve ve MVP lo ni tawhin, Wilt Chamberlain leh LeBron James ten chawimawina ngaihhlut hlawh tak hi vawi li ve ve an lo dawng tawh bawk.