French Open 2024 khelh chhunzawm zel a ni a, Pathianni zing khan champion lai Novak Djokovic chuan harsa taka hnehna changin last 16 a lut. Inrinni zana inkhel dangah Alexan Zverev pawhin harsa taka hnehna chang hramin tlawm a poumpelh ve bawk.
Kum 2024 chhunga final la lut miah lo Novak Djokovic hian fourth round ah Italian Lorenzo Musetti a hmachhawn a, set khat a lak hnuin set hnih a hloh zawn. Musetti lakah mualpho thei dinhmuna a din laiin set hnuhnung pahnihah ropui takin a inlan a, set la zawnin tlawm a pumpelh thei hram.
Grand Slam-ah vawi 24 zet champion tawh Djokovic hian Court Philippe-a a khingpui Musetti lakah break a neih a chhawr tangkai a, set khatnaah tie-break khelh ngai em lovin set ala thei hram. Champion lai lakah set hloh hmasa mah se Musetti a buai lo va, a khel tha chhunzawm hle. Back-hand nei tha tak Musetti hi set hnihna tie-break-ah chungnung zawk niin set a la. Set a lak hnuin a khel tha lehzual a, Djokovic-a hmaah meuh pawh a tisual duh meuh lo. Set thumnaah break nei zawnin set a la zui leh a, Djokovic hneh turin set khat chiah lak belh a mamawh tawh.
Dinhmun derthawng taka a din laiin Djokovic a insiamtha a, khawng taka inlanin a hawi kir tawh lo. Serbian pa huaisen Djokovic hian set linaah break nei zawnin set a la a, 2-2 niin deciding set khelh chhunzawm a ni. Deciding set ah ropui leh zualin Djokovic a inlan a, a serve a hum vek bakah a khingpui serve zawng zawng a break vek a, game hloh eih lovin set a la a. Darkar li leh minute 29 zet an inkhelh hnuin Novak Djokovic hian 7-5 6-7 (6-8) 2-6 6-3 6-0 in hnehna an chang a, last 16 a lut.
Musetti lakah harsa taka a chak leh tak vangin Djokovic hian Grand Slam-a chak hnem ber Roger Federer record 369 a nihrual a. Francisco Cerundolo hneha quarter-final a lut a nih chuan Grand Slam a chak tam ber record thar a siam ang.
- Zverev a him hram
Rolland Garros a player ropui ber Rafael hneha bul tan Alexander Zverev chu Inrinni-a a khingpui Dutch 26th seed Tallon Griekspoor hneh lovin a tlawm teuh hle. Inkhelh hmuhnawm takah set hnih ve ve an lak hnuin deciding set ah Zverev hi 4-1 ngawtin a hnufual hman. Last 16 lut zo lovin a tla ngei tura ngaih a nih hman laiin Olympic champion Zverev hian pui zetin a khingpui a bei let a, tie-break ah 10-3 ngawta chungnung zui lehin a khingpui Griekspoor lakah hian 3-6 6-4 6-2 4-6 7-6 (10-3) in hnehna a chang a, last 16 a lut.
Griekspoor lakah harsa taka chak Zverev hian last 16-ah inkhel hautak a hmachhawn zui leh dawn a, Denmark’s 13th seed Holger Rune a hmachhawn zui leh dawn. Zverev hmachhawn tur Rune hian a khingpui Jozef Kovalik chu 7-5 6-1 7-6 (7-2) in a hneh a, harsatna lian tawk lovin last 16 a lut.
Inrinni zana inkhel dangah fifth seed Daniil Medvedev chuan Tomas Machac chu 7-6 (7-4) 7-5 1-6 6-4 a hnehin last 16 a lut a, hetihlai hian 15th seed Ben Shelton suffered chu Felix Auger-Aliassime hneh lovin a tlawm ve thung.