Kuminah thla nga a liam a, India rama firfiakte hmunpui tia sawi ngam, Jammu & Kashmir-ah chuan firfiak 100 chuang thah tawh an ni a, an zinga 23 chu ram dang mi an ni. He chanchin hi a lawmawm rualin venhim hnathawktute chuan hel pawl zawm thar hi an pung ve zel niin an sawi bawk.
March thla atang khan thalai 50 chuangin firfiak pawl hi an zawm thar thu an sawi a. Hemi titawp tur hian an inzawmna laipui chhut chah a tul thu te, chhungkaw tin hnena zirtirna pekte a pawimawh thu an sawi.
Thuneitute chuan May 31 thleng khan firfiak 101 an that tawh a, an zinga 23 chu ram dang mi niin 78 chu tualchhung mi an ni tih an sawi a. An mi that zingah hian al-Qaeda firfiak pawl hnuaia awm, Ansar Ghazwat-ul-Hind chief Zakir Musa pawh a tel niin an sawi.
Musa hi May 23 khan thah a ni a, a hnuah hian a kaihhruai pawl hi darhin Hizbul Mujahideen firfiak pawl an zawm fur nia an hriat thu thuneitute chuan an sawi bawk.
Sorkar thuneitute chuan firfiakte laka beihpui thlakin ralthuam nena thawh chhuah mai a tawk zo tawh lo va, thalai leh nu leh pate pawh hetianga a hel zawnga kal lo tura inzirna tha pek tel a ngaih thu an sawi.
Thla nga liam ta chhunga firfiak thahte hi Shopian-ah an tam ber a, mi 25 thah niin an zinga 16 hi tualchhung mi an ni a. Pulwama chuan dawtin firfiak 15 kah hlum an ni a, Awantipora-ah leh 14 leh Kulgam-ah 12 thah an ni bawk.
Heng firfiak kah hlum tamna hmunte hi Kashmir chhim lam vek an ni a, thah an thahnem ang bawkin a zawm thar an tamna lai a ni lehzel bawk a ni.
Thuneitute chuan tun thla tawp atanga tan tur, thla hnih awh Amarnath Yatra lo thleng tur chu ram dang atanga firfiak lo luhna remchang a nih an hlauthawng hle a. A bikin Jammu-a Poonch leh Rajouri district-ah leh Kashmir Valley-a LoC kân Yatra hi remchanga laa India an luh theih phah an hlauthawng hle.