June 14, Zirtawp zan khan Euro 2024 khelh tan a ni a, inelna thlengtu Germany chuan an khingpui Scotland chu 5-1 ngawtin an sawp a, thuthusama thain bul an tan.
Euro 2024 match hmasas ber hi Bayern Munich khelmual Alianz Arena-ah khelh a ni a, inelna thlengtu Germany leh Scotland ten bul an tan. Euro-a vawi thum champion tawh leh a zawna vawi 14 ngawt Euro khel zawn Germany hian Scotland lakah rin an kai zawk viau a, champion tura rinkai ber pawl an ni bawk. Inelna thlengtu leh champion tura rinkai Germany hian tlang rin aia thain bul an tan a, 5-1 ngawta Scotland an hneh hi European competition-a an chak chian ber tum a ni hial a ni.
Team ngaihven hlawh Germany hian an tualzawlah tha zetin bul an tan a, inkhel tan tirhteah goal thun theihna hun tha neiin, Florian Wirtz chuan a hun tha a hlah nghal. An hun tha hmasa hlah bawk mah se Germany an hawihai rei lova, minute 10-na lekah Florian Wirtz chuan fuh taka goal thunin, Euro 2024 a goal hmasa ber a thun.
Hma taka goal an chhuah vangin Scotland an buai zui viau a, an khingpui Germany an ngam lo hle. Scotland an buai laiin Germany an phur viau thung a, goal pawh an thun belh leh thuai. Wirtz goal thun atanga minute 9 hnu lekah rawlthar ngaihven hlawh Jamal Musiala chuan chiang zetin a pet goal a, an goal hnihna a thun. Season liam taah club tana chetha rawlthar pahnih; Musiala leh Wirtz ten Euro-ah goal an thun nghal hi Germany tan chuan thawk huaina tham a ni.
Minute 20 an khelh tlin hmaa goal hnih an chhuah vangin Scotland an buai a, an buaina belhchhah turin chawlhlawk hmain penalty an chawi zui leh. Minute 45-naah Ryan Porteous chuan penalty a chawi a, Porteous hi hnawhchhuah a ni zui bawk. He penalty hi Niclas Fullkrug aia lut hmasa Kai Havertz chuan awlsam takin a pet goal a, an goal thumna thunin an hmahruaina a tizau.
Chawlhlawk hmaa goal thum ngawt an thun bakah tam zawk an nih vangin Germany dinhmun a tha viau. An hmahruaina a chhah tawh em vangin manager Julian Nagelsmann chuan a player tha thenkhat a lachhuak a, team a siksawk. Bench atanga lut Niclas Fullkrug chuan mualchhung a luh hnu lawkah Germany goal lina a thun a, an hmahruaina a tihzau belh.
Germany lakah si li fai ngawta an hnufual hnuin Scotland an vannei a, goal khat an thawkchhuak. An si phurh sut tuma tan khawh Scotland ball tauh chuan Germany defender Antonio Rudiger lu a fuh a, si nghak Manuel Nuer dan rual lohin goal-ah a thlawt lut a, minute 87-naah Scotland in an si phurh an sut then. Scotland in an si phurh an sut hnu lawk hian bench atanga lut Emre Can chuan minute 90’+3 -ah fuh zetin a pet goal a, Germany goal ngana thunin, a tawp a khar. Hun tawp thlengin goal dang a luh belh tawh lova, Germany chuan 5-0 a Scotland sawpin, Euro-a an chak chian ber hun duhawm an tawng.
Euro-a champion ngun ber Germany leh Spain te chu vawi thum ve ve an champion tawh a. Germany leh Spain te hi champion tura rinkai an ni dun leh mek bawk. Germany hi an ramah ngei an champion thei a nih chuan Euro-ah vawili champion thei hmasa ber an ni ang.
Inrinni zan khan Group A-a awm Switzerland leh Hungary te Cologne Stadium-ah an inkhel a. Kwadwo Duah, Michel Aebischer leh Breel Embolo te goal thun hmangin Switzerland in 3-1 in Hungary an hneh. Switzerland laka Hungary goal neih chhun hi minute 66-naa Barnabás Varga thun a ni.