Pakistan-a Indian High Commission-a driver pahnih, Thawhtanni zingkar atanga bo, a hnua Pakistani hnuchhui pawlin an kawl tih hriatte chu Thawhtanni zanah chhuah lehnghal an ni tawh a; mahse, ISI-in an kawl chhung hian kut an tuar nual a, hliam tenau an nei.
Driver-te hi kut an thlak bakah hian an dawp a, eng thil thilah nge an inhnamhnawih tawh tih pawh an zawt nual.
Indian hnathawkte hi zing dar 8:30 leh 8:45 inkar velah High Commission bul lawka petrol station-a an awm lai chu lirthei 5/6 vela chuang mi 15-16 velin an man a. An mit tuamsak niin an kut pawh khirhsak an ni a. Phur chhuakin khawiah nge an kalpui an inhre lo.
“A ru botute hi ralthuam nena inthuam niin an hren chhungin video eng emaw zatin an awm dan an la a. High Commission-a thawktuten eng nge thil an kalpui dan te, pisa chhung leh pawn lama mi an kawm dante pawh an dawp,” tiin an tan laia an awm dan sawitu pakhat chuan a sawi.
“Tlai dar 2:00 vel thleng thu zawh an ni a, hetih chhung hian thir leh thing tiang hmangin vuak an ni a, hnek an ni a, tui bawlhhlawhte pawh an intir a. High Commission-a thawk sang ber atanga a hniam ber thlanga an chet vel dan leh an tih berte an zawt,” a ti.
Hetianga an dawp chhung hian kut an thlak reng a, hetiang hi nakin zela High Commission-a thawk dang an mante pawh an la tih dan tur a nih thu an hrilh reng bawk.
Driver-te hi damdawi inah pawh hruai an ni a, tetanus hmanga chiu an ni ngeia hriat an ni bawk.
Thawhtanni zan dar 9:00 vel khan High Commission-ah hian thawn let leh an ni a. Keini an kal thei a; mahse, an hmai, mal, nghawng leh an hnungzangah hliam an nei nual a. Nunna atana hlauhawm erawh a ni lo hlawm.
India hian Pakistan-a a hnathawk an bo veleh hian New Delhi-a Pakistan Charge d’affaires Syed Haider Shah chu hriattir nghalin Pakistan chu chhuah nghal turin a ti a. Pakistan-a Indian High Commission pawhin Pakistani thuneitute a dawr zui nghal bawk.
Pakistan-a India sorkar tana hnathawk ruk bo an ni hi India-in New Delhi-a Pakistani High Commission-a Pakistani thawktu mi 2, India enthlak hna an thawk nia a hriat avanga a thawn hawsak hnu ni 2-a thleng a ni.