Pathianni zing khan boxinga WBA lightweight huangah kawnghren inchuhna inhnek hmuhnawm tak a awm a. Champion lai Gervonta Davis chuan a khingpui Frank Martin a knock out a, a kawnghren a humhim.
Professional huangah tlawm la nei lo pahnih Davis leh Martin ten kawnghren an inchuh hian ngaihven a hlawh a, inhnek entu pawh an thahnem hle. Round khatna atangin inhnek a hmuhnawm nghal a, beisei lawk aiin Martin-a’n bul a tan tha a, Davis lakah a tang rei thei viau. Inhnek a rei telh telh a, champion lai Davis a chungnung telh telh thung. Round 8-na tawo lamah Davis hian a khingpui hi ring kilah a dang bet a, chiang zet zeta a hnek fuh hnuin thochhuak leh tur awm lo khawpa chiangin a hnek tlu a, knock out in a chak zui ta a ni.
WBA lightweight huanga vawk lal len mek Gervonta Davis hian professional huangah inhnek vawi 30 a hmawchhawn tawh a, a la chak vek. A hneh tawh mi 30 zinga mi 28 zette chu knock out hmangin a hneh hial nghe nghe a ni. Tlawm nei lova Davis a kal zel laiin Frank Martin erawh chuan a vawi khat nan tlawm ni hmel a hmu ve ta thung.