Euro 2024 khelh mekah pathianni zan khan team lian Netherlands an inlan a, Poland an hmachhawn. Defender nei tha Netherlands hian si an phurh hmasak zet hnuin Poland an hneh let a, harsa takin point thum an hmu.
Netherlands leh Poland te hi Volksparkstadion, Hamburg-ah an inhmachhawn a, inkhel hmuhnawm an lantir. Poland hi an captain leh an goal thun khawl Robert Lewandoski tel lovin an inlan. Goal thun thei leh tawnhriat ngah Lewandoski tel lova defender lar tak tak kawl khawmtu Netherlands hmachhawn hi Poland tan thil chakawm loh tak a ni a, chak turin rin an kai loh phah lehzual. An goal thun khawl Lewandoski awm lo mah se Poland hian goal an thun hmasa teh mial a, inkhel tan atanga minute 16-na lekah Adam Buksa chuan hmahruaina goal thunin, Dutch a barakhaih.
Buksa goal hian Netherlands an chhaih kawlh a, na takin an khingpuite an nawr let nghal. Ronald Koeman-a team te hian ball an chang tam a, goal hlauhawm an ngah sawt hle. Na taka an khingpui an nawr rah an seng thuai a. Minute 29-naah Liverpool forward Gody Gakpo chuan goal thunin an si phurh a sut a. 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, goal thun tumin an innawr tawn nasa hle. Poland hian ball chang tlem zawk viau mah se awm ze nei takin an khingpuite an nawr let a, shot on target ngah zawk an ni hial. Hun rei tak goal a luh belh theih loh hnuin ram tan a hunte a rah thin Wout Weghorst chuan mualchhung a lut. Ram tana goal thun thei tak Wout Weghorst hian mual chhung a luh atanga ball a deh hmasak ber minute 83-naah Netherlands hmahruai letna goal a thun a. Weghorst hi mamawh chhanna ni nawn lehin an ram a chakpui a, Poland lakah point thum hlu tak an hmu.
Netherlands hian Group D-ah fiahna hautak an hmachhawn zui dawn a, zirtawp zan khian champion tura rinkai zinga mi France an hmachhawn dawn. Netherlands captain Virgil van Dijk chuan France hi hneh har ber tura a ngaih thu a sawi a. An group a mi Austria pawh hmachhawn a harsa viau turah a ngai bawk. An group a awm zingah Poland hi awlsam deuh ber tura a ngaih a ni a, awlsam ber tura ngaih lakah pawh harsa takin an chak thei hram chauh. Netherlands khan Poland lakah 66.1% zet ball chang chungin shot on target-ah vawi thum ngawtin an hniam zawk thung a, insiam that an mamamawh.
Team lian Netherlands lakah an tlawm a, France an hmachhawn zui leh dawn bawk vangin Poland hmabak a hautak viau a. Last 16 lut thei turin Austria an hneh a, France lakah tlawm an pumpelh a ngai tawhin a rinawm.