Mizo Student Union, Sub-Headquarters Rawpuichhip buatsaihin kum 2024 HSLC leh HSSLC a Zirlai hlawhtlingte lawmpuina hun nimin khan hman a ni a. Tin, Hindustan Petroleum Corporation Ltd(HPCL) in CSR kaltlanga Rawpuichhip Presbyterian English School te tana School Bus an pek chu in hlanna hun buatsaih a ni bawk.
He hun hi Er. H. Lalzirliana, MLA Mamit Constituency chuan khuallian niin hun a hmanpui. Khuallian chuan Mizo thalaite’n Zirna hi Hnam thil a ni tih kan hriat a ngai a, ram leh hnam hmasawnna atana pawimawh hmasa ber chu Zirna hi a ni a, khawtlang leh kohhran ang pawha tanrual zel a tul thu a sawi. Zirlaite’n ngaihsan tur diktak kan hriat a pawimawh thu sawiin, kan khawtlang leh kan ram in min chhuanawm tak tak a neihte kan ngaihsan thiam a tul tak zet a. Mizo hnamah Pathianin min siam angin, kan ram leh hnam, khawtlang tana mi hmantlak leh tangkai ni turin Zirlaite a chah a. A zau thei ang bera mizo thalaite kan in zarpharh zel a tul tawh thu a sawi bawk a ni.
Tin, CSR Project kaltlanga HPCL in Rawpuichhip Presbyterian English School-te tana BUS an pek chu inhlanna hun neih a ni a. HPCL atang hian Guwahati Regional Office atangin Senior Manager Mr.Anish Deb leh Mr. Rajkishore Thakura Sr. Manager, Retail Sales Silchar-te chuan he hun hi an rawn hmanpui a ni. HPCL hotute chuan Rawpuichhip zirlaite tana BUS an pe thei chu a lawmawm an ti a. Mizoram tan CSR kaltlangin theihtawp chhuaha hmalak zel an tum thu an sawi bawk a ni.
HPCL-te hian NGO hrang hrangte tan leh Mizoram hmun hrang hrang ah CSR kal tlangin luanchhuahna thahnem tak an lo nei tawh a. Tun hnai maiah Lengpui PHC- ah Ambulance leh X Ray khawl pe in, School Bus bik hi Lengpui PES-ah te, Mamit PES-ah te, St Francis of Assisi School, Mamit ah te an lo pe tawh bawk a ni.
Program hi MSU Sub-Headquarters Rawpuichhip President Zohruaisanga chuan kaihruaiin, PC Vanlalfinga Adviser MSU chuan hunserh a hmang a ni.