- Ruata
Hero MotoCorp chuan an bike chhuanvawr leh hralh tam, India ram mipuiin an duh em em Splendor model zinga Splendor+ -ah Xtec 2.0 an tlangzarh thar.
Hero Splendor hi chu petrol heh lo bike hmingthang niin India ramah ngat phei chuan leitu an tam hle a. Khawpui chhunga veivahna mai bakah thingtlang kilkhawr ber thleng lirthei ke hnih neiah chuan mipuiten an hman tangkai pawl tak a tih theih awm e.
Hero Splendor+ Xtec 2.0 hi Rs. 82,911 (ex-showroom) man a ni dawn a. Xtec model chhuak mek nena khaikhin chuan a man hi Rs. 3,000 velin a to zawk dawn a, thil thar hrang hrang kan hmu bawk a ni.
Hero Splendor+ Xtec 2.0 hi a huangchhung bike hoa full LED headlight with LED DRL nei hmasa ber a ni dawn a. H-shaped taillamp pawh neiin turn indicator design thar a rawn nei a, hazard light leh a switch bik pawh a rawn nei bawk a ni. A landan hrim hrimah hian a hmaa chhuak nena a danglamna chu a body graphic thar hi a ni a. Hei hian leitute rilru pawh a tih thar a beiseiawm a. A mawi hle bawk a ni.
A hmaa lo chhuak tawh Xtec model-a awm ngai lo dual tone rawng chi thum thar kan hmu dawn a. Heng rawng te hi Gloss Red, Gloss Black, leh Matte Grey.te a ni a, a mawi hlawm viau a ni.
A kentel lamah hian a hmaa Xtec pawhin a lo neih tawh ang tho full LED instrument cluster with Bluetooth connectivity kan hmu leh a. USB charging port a rawn nei a, hmanraw changkang hrang hrang – idle stop-start system (i3S), side stand engine cut-off feature leh electric starter te kan hmu bawk a. Hei hi a hmaa chhuakah pawh kan lo hmuh tawh a neih zui tak zel te a ni.
A khawl lamah pawh hian danglamna liantham a awm lo a. 2024 Splendor+ Xtec 2.0 hian a hmaa Xtec model chhuak pawhin a hman ang, 97.2cc, single-cylinder, air-cooled engine, 4-speed gearbox nena thlunzawm a la hmang zel a. Splendor+ Xtec hian 80/100-18M/C 47P front tubeless tyre leh a hnunglamah 80/100-18M/C 54P tubeless tyre te a rawn hmang dawn a.
Suspension lamah chuan a hmalamah conventional telescopic hydraulic shock absorber leh a hnunglamah swingarm with 5-step adjustable hydraulic shock absorber te a hmang dawn bawk a ni. Braking lamah chuan 130mm front drum brake leh 130mm rear drum brake te a hmang bawk a ni.
Hero bike man tlawm, chuai thei lo leh leitu tam reng mai Splendor chi thar, changkang bawk si a rawn chhuak leh hian India ram mipui pawh a hip leh viau beisei a ni a. Market lamah pawh Hero MotoCorp tan malsawmna tha tak a nih leh ngei a beiseiawm a ni.