ZPM General Headquarters chuan nimin khan chhung inkhawm neiin, Laltlanmawia General Secretary in kaihruaiin, Rev. Kapzawna, Executive Member Upa Committee in hunserh a hmang. F.Rodingliana, Minister Of State, P&E Dept etc. changtu hnen atangin thu sawi an ngaithla bawk.
Marova chuan, “Kalphung thar Mipui Sorkar hnuaiah Mizoram chuan tunhmaa kan la zawh ngai loh kawng kan zawh mek a, kum 37 chuang zet kalphung hluia kan lo kal tawh avangin mipuite leh Sorkar Office-a thawktute pawhin ngaia kan lo neih tawh thil tam tak a awm a ni. Hei vang hian kalphung thar hi kan zirchian tlan a ngai a, kalphung thara kal thei turin kan indawm kan tawn a ngai hle bawk, ṭawngṭaina nena min din pui tlat turin ram mipuite pawh ka sawm a ni”, a ti.
Minister chuan, “SASCI Sum lapse chungchangah mi thenkhatin Sorkar thar thiamloh ang lek lekin thu an thehdarh a, hei hi pawi ka ti hle a ni, Sorkar hmasain SASCI sum a hman dan leh a kalpui dan zirchian chuan a bilha tho lo a ni a, ni khat thilthuah hna lian tak tak hmun 270 vel ami chu mi 43 hnenah pek chhuah a ni a, Election Model Code Of Conduct in a phuar zui leh ta si a ni. Council Of Ministers thukhawm chuan ngun takin kan ngaihtuah a Utilization Certificate (UC) lem hmanga sum lapse tur dan beh ai chuan kan ram leh Sorkain malsawmna kan dawn zel theih nan Pathian tihna avangin kan hnawl ta a ni. SASCI 2023-2024 hna ah hian Sorkar thar hi a inrawlh lo hrim hrim a ni,” a ti a.
Power & Electricity Department chungchâng sawiin F.Rodingliana chuan, “Tunlai hian Power Supply a khaihlak fo thin a, hei hi Distribution loss tih tlèm nan hrui tè zawkte hrui liana kan thlâk mêk vang a ni a, Aizawl aṭangin kan ṭan a, a tahtawl zela hmalak a nih avangin, kan lo thim zeuh zeuh a nih pawhin mipuite hriatthiamna kan han dîl a ni”, a ti a, “Electric bill siamna atâna kum 2022 aṭanga software kan hman Virtuoso SAP Software hi kan duh khawp lo deuh a, meter reading manual a lak a, manual a entry chu tihsual a awm fo ṭhin avângin heng dik lo nuai bo nan hian RDSS hnuaiah smart meter reading tih tum a ni,” a ti bawk.
Printing & Stationary Department hmalâkna sawiin, “Sikul naupang zirlaibu subject 46 atan copy 4,96,030 kan chhu a, sem chhuah hman vek a ni a, chhut belh mêk a ni a, a kawm hi tuam hran ngai lova laminate vek a ni a, a chhûng paper thlengin Delhi-a sawrkâr school-te nen danglamna a awm lo a ni”, a ti.
Commerce & Industry lam sawiin, “Tualchhûng thilsiam humhalhna tur Preferential Rules 1994 kan ennawn mêk a, Industrial Policy 2024 pawh kan peih ṭêp a, bâna kaihna tur AMEN Scheme pawh kan peih fel tawh a, cabinet approval kan hmuh chuan Industry lama tui mite tân chuan ‘mana’ a ni ang”, a ti bawk a ni.