Sorkar laipuiin ‘Ayushman Bharat Health and Wellness Centres’ chu ‘Ayushman Arogya Mandir’ tiin a hming a thlak a, Mandir tih hming pua thlak hi Mizoram sorkar chuan a duh lo thung a, ngaihhnathiamna pea, a hming ngai hman a nih theihna tura state sorkar dilna chu thla 6 hnuah pawh sorkar laipuiin a la chhang lo.
Union Health Ministry chuan nikum november thla khan hming thlakna thupek ti chhuakin, state leh Union territory zawng zawng chu hming thlakna chu 2023 tawp hmaa ti fel turin a hriattir a. Hetihlai hian sorkar laipui thupek hi Mizoramah chuan a taka kalpui a la ni ta lo.
Mizoram sorkar chuan nikum December thla khan hming thlak chungchangah hian ngaihhnathiamna pe turin sorkar laipui ah ngenna an thlen a, lehkhaah chuan Mizoram chu kristian state, a mi cheng zaa 90 vel kristian sakhaw zuitu an nih thute chumi avang chuan hriselna lama inenkawlna hmun ‘Mandir’ tih hming put tir chu a rem loh thu ziah lan a ni.
Hemi chungchang zawhna chhangin Mizoram sorkara thuneitu sangte chuan hming thlak chungchanga ngaihhnathiamna pe tura an dilna chu tun thlengin chhan a la ni lo a, a chhanna hi an la nghah mek thu sawiin, tun dinhmunah chuan Health and Wellness Centre te chu a hming an thlak lo tih an sawi a; hming thlak hi kan duh loh thu chiang takin kan ziak, an ti.
Sorkar thuneitu sangte chuan Hindu sakhaw zuitute Biak In hming ‘Mandir’ tih hming pua inentir chu Mizo mipui te’n an duh dawn lo a, mipuite centiment a chhe vek dawn tih sawiin, chumi avang hian a hming ngai hi put tir chhunzawm phalna pe tura an ngen thu an sawi a ni.