#Zozam Times July 03: Lushai Technologies & Consulting (LushAITech)-in an siam chhuah Mizo tawnga Generative Artificial Intelligence hman theih tur hmasaber ‘kaihruaitu’ leh ‘Gov.AI’ te chu zanin dar 8-ah LPS studio-ah tlangzarh a ni dawn.

LushAITech kutchhuak Generative AI hi LPS neitu, Govt Hrangbana College Principal hlui Lalrochuanga Pachuau-in a tlangzarh dawn a. Heng product pahnih te hi Mizo tawng veka hman theih a ni a, ‘kaihruaitu’ hi rilru lama harsatna nei, mangang leh lungngaite tanpui thei tura siam niin, ‘Gov.AI’ hi sawrkar public information pawimawh mipuite tana awlsam taka hriat theihna leh zawhna zawh theihna tura duan a ni.

Mizo GenAI hmasaber siamchhuaktu LushAITech Company hi Mizo IT Professionals, Multi National Company-a kum 10 chuang experience nei tawh te din a ni a, tunlai IT lar tak Artificial Intelligence leh Cloud Computing Technology lama thiamna nei leh AI leh Cloud lama software development experience nei te an ni.

He Company hian Mizo thalaite AI leh Cloud Technologies lama thiamna hlanchhawn leh zirtîr bakah Mizoramin a lo hman tangkai theih tür software product siam chhuah chu an tum ber niin an sawi bawk.