Nimin khan Food, Civil Supplies & Consumer Affairs (FCS&CA) Minister B. Lalchhanzova chuan Aizawl Press Club-ah thuthar thehdarhtute kawmin, ration card var neite tana sorkarin subsidy a pek thin chu tih tlem a nih thu leh retailer hlawh tihpun a ni thu a sawi a. VIP buhfai quota tihtawp a nih thute a sawi.
Buhfai kg khata subsidy Rs 25 an pek thin chu Rs 10 ah tihniamin, card var hmangtuten Rs 15 a an khulh thin chu Rs 30 in an khul tawh dawn a. Retailer lawmman kg. khata Rs 0.50 ni thin chu Rs 1.50 ah tisangin bawkin; Cabinet Meeting ni 18.6.2024 a neihin a rel angin, CM, Minister, MLA leh Group A officer te tana buhfai quota kan lei thin tihtawp ni se, hmahruai ila, khawsak harsa lem lote pawh ngen chhoh zel nise, kan ti, a ti bawk.
He subsidy ennaw hian NFSA dawngtu card eng leh card pawl hmangte erawh a nghawng ve dawn lo a, sorkar chuan miretheite tuar loh dan tur ber a ngaihtuah tih Chhanzova chuan a sawi bawk.
Hetih lai hian Supply Minister chuan, food security a awm mamawh ngawih ngawih card var nei an awm tih sawiin, hemi chingfel tur hian hmalak chhoh mek a ni a. Khawpuiah chhungkua kum khata cheng nuai 4 lalut zo lo leh thingtlangah cheng nuai 2.5 lalut zo lo food security-ah rinluh an ni dawn, hmalak chhoh mek a ni, a ti bawk.