Nimin khan Hnam Runah MNF General Headquarters, Elected Office Bearer-te leh Aizawl khawpui chhunga MNF Local Council member ten joint meeting pawimawh tak an nei.
He joint meeting hi Dr. R. Lalthangliana, Sr.Vice President chuan kaihruaiin, Lalruatkima, Treasurer pawhin thu a sawi.
Dr. R. Lalthangliana chuan, Local Council member-te nena inhmuhkhawm rawt a nih chhan te sawiin kumthar lama Local Council inthlan lo awm tur atana tun atanga inbuatsaih lawk a tul thu te a sawi a.
MNF Treasurer, Lalruatkima chuan, “MNF hi party a ni satliah lova, hnam thuthlung kengtu kan nih avangin MNF Local Council Member-te chu kan chungah mipui mit a fu bik a. Hna kan thawhna reng rengah tha takin kan ti zel tur a ni a. Mahni veng chhungah min mamawhtute chu kan hawisan tur a ni lo,” a ti bawk.
He joint meeting-ah hian Aizawl City Local Councils Association (ACLCA) hruaitute hnen atangin hmalak tawhnate leh tuna MNF-in Local Council-a rorelna an channa te leh party dangin Local Council-a rorelna an channa te ngaihthlak a ni a, tun dinhmuna ACLCA hnuaia Local Council dinhmun hriat theih te:
Aizawl Khawpuia Local Council a zat — 85
MNF LC—73
ZPM LC— 6
Cong LC— 6
He meeting-ah hian rawtna leh thurawn te bakah, MNF party hmasawn zelna tur leh insawhnghehna tur te an sawiho bawk.