- Mahmuaka Chhakchhuak
Zofate Jerusalem tih hiala kan sawi leh Mizote tana khawpui pawimawh ber Aizawl khawpui hi khawpui hmun rem tak chu nichiah lo mahsela a chhunga chengte avangin khawpui nuam tak a ni ta zawk maiin a boruak thatna avang pawh hian khawpui nuam a tling a. Hetiang taka khawpui boruak nuam hi a tamin a rinawm loh a, dam sawng sawngna tham a tling takmeuh a ni. Chutih rual chuan kan Aizawl khawpui hi a chhunga chengte avang vek chuan chenna atana hrehawm khawpin tunah chuan alo awm ta a. Engtianga khawpui hrehawm lo ni ta nge tih chu kawng tam takin sawi tur a awm thei ang a, a leilung zir loh leh thildang vang ai mahin a chhunga chengte’n hmangaihna nena kan enkawl loh avangin kan khawpui hi alo hrehawm ta a ni ber zawkin a hriat.
Tunah chuan Aizawl khawpui hian a phurh zawh loh a phur ta em ni tih mai tur a ni a. Hmun khawkrawk leh kham chherchhia nia kan hriat a, In sak ngam lohna tur kan tih zawng zawngahte chuan In ropui leh lian tak tak a ding tain hmun awl reng a awm ta lo. Kumtinin leimim a tam em em reng bawk a, khawpui chhunga tuihawk luang lah chuan tuikawr pawn lamah bawlhhlawh chi hrang hrang a hnutchhiah reng bawk nen hian kan khawpui hian tihdanglamna nasa tak a tawk tih chu phat rual a ni ta lo. A chhunga chengte kan changkan leh nalh hlawm tehreng nen hian kan khawpui chuan lang lo lamah hrehawm tinreng alo tuar ve mek a ni ber mai a, nitina lirthei nalh tak tak nena kan tlan reng lai leh kan nula thenkhatte’n pawnfen chhing tak tak nena khawlaia an len mek maiin kan khawpui chuan a rukin natna hrehawm tak a tuarin a rum tlawk tlawk a ni ber mai.
Lirthei lah chu a pung chak em emin traffic jam tihrehna tura ruahmanna tha tlak tak hi ala awm thei meuh lo chu a nih bawk si avangin traffic jam tihrehna kawng nia kan hriat – lirthei intlanchhawk lah chuan awmzia a awm der bawk si lo. Tute emaw lah chuan kan ram hruaitu; Minister emaw MLA tu emaw two wheeler-a chuang an hmuhin an lo fak hmanhmawh zel bawk a. Ram hruaitute two wheeler chuang hi fak loh tur kan tihna lam niloin kan Aizawl khawpuiah hi chuan eng lirthei tan pawh hian duh ang taka tlanna hmun leh hun hi a awm thlawt loh avangin Car nalh tak chhunga thu chunga rei tak tak kawnga hun hman ai chuan two wheeler-a reilote chhunga thlen mai kha a lo awlsam zawk fo thin avangin leh hun hlutna hre takin an kal mai thin zawk a ni a. Hei vang hian fak leh chawimawi an beisei leh phut vang ni hauh loin hun an ren vang zawk tih hriat a, hun hman that an tum hle mai tiin emaw alothlawna hun senral an ui hle mai tiin sawi ta thin zawk ila a dik awm e. Lirthei intlanchhawk chungchang pawh hi thui deuh taka sawi tur a awm theiin a rinawm a, lirthei a tipung tih leh traffic jam hian a ziaawm phah kher lo tih hian tanchhan tha tak a awm zawk mai thei.
A pawimawh berah chuan Aizawl khawpui chhunga chengte hian hmangaihna tak tak nen kan khawpui hi enkawl ni ila chuan heti taka hrehawm hi a ni lo tur a ni a, tu emawin ruahsur bur bur lai chu remchanga laa septic tank alo sah emaw, chhungkaw awmthei deuh te’n an chhungkaw member aia tam lirthei an kawl emaw, vantlang hmun nek chep chunga mimal In leh lo din kan uar vangte leh thil dang vangte hian kan khawpui hi khawpui hrehawmah kan siam a, ala hrehawm belhchhah zel dawn em ni tih tur a ni bawkin a hriat. Heng zawng zawng aia la pawi tur zawk chu kan pisa hrang hrang, lirthei leh mimal chenna hmuntea Air Conditioner (AC) hman kan uar tak vang hian nakin lawkah chuan khawpui chhungah hian lohtheihlohin thli vawt nuam tak thaw tawh loin thli lum huam huam ala thawh ngei dawn tih a chiang reng bawk. Chutih hunah chuan Aizawl khawpui hi khawpui hrehawm lehzual a ni ang a, phai ram khawpui dangte ang bawkin nipui lai chuan pemchhuah san chakawm tak hian ala awm ve bawk ang.
|umkhat chu lohtheihlohin ruah do ka ngai a, Republic veng atangin ITI lamah two wheeler hian ruahsur nasat em em laiin kan tlan thla a, raincoat ka neih loh avangin a huh pawh ka huh nasa reng a, chutia ka tlanthlaknaah chuan kawngpuiah hian tuihawk alo luang nasa em em mai a, hmun khat chauhah niloin hmun nga vel lai turah hian nasa takin tuihawk alo luang a. lirthei tan pawha tlan hrehawm khawpin a luang a, bawlhhlawh chi hrang hrang nena kan khawpui chhung kawngpuia tuihawk a rawn luang chu a inhmeh lo hle mai. Eng vanga hetiang taka tuihawk hi luang nge tiin han zawt kual ila naupang thil tisual ang maiin a ti tu ber chu chhuichhuah a har tawh dawn bawk si a, midangte lah chuan siamthat kan tum bawk chuang si lo chu kan zavaia harsatna kan tawh chhan chu a ni ber awm e.
Dan tha tak tak a awm rualin mipui lamin dan tha takte chu kan zawm leh chuang silote hian harsatna kan tawh phah tih pawh hi phat rual a ni lo. Lirthei dah danah a ni emaw Insak dan a ni emaw kea kalna tur (footpath) thlenga sumdawnna hmuna kan hmang tate hian harsatna min thlen a nih hi. Keimahni insiam chawp harsatnate hi pumpelh theih a nih rualin pumpelh harsa kan ti tlat maite hi engemaw a chhan ber ni ang le? Kristianna atanga thlir phei chuan midang tana malsawmna ni tur zawk kan nih laia midang tana harsatna thlen kan pawisa hauh chuang si lote hi ringtu belh chian dawl lo kan nihna a ni a, vanram kai hi kan tum tak tak lo zawk em ni tih tur a ni. Tirhkoh Paula ngeiin ‘A theih phawt chuan nangmahni lam tal, mi zawng zawng nena inremin lo awm rawh u’ a tihte chu biakbuk chhung chauha nunpui tur emaw kan ti ni ber hian a hriat a, biakbuk pawn lamah hian nunpui tum ta zawk ila, kan sumdawnna hmunah a ni emaw kan hnathawhna hmunahte hian lantir ta zawk ila ringtu dik tak zia ni zawk tur a ni si a. Nimahsela a ni hauh si lo hi pianthar nawn fo ngai ringtu kan lo nih zawh phah ta a nih hi.