- Ruata
TVS chuan an scooter chhuanvawr leh hralh tam, Ntorq chu a thar an tichhuak dawn a, hei hi special edition tur niin a hmingah Ntorq Race XP an vuah.
Ntorq thar tur hi black edition a ni dawn a. Rawng dumin mawi takin chei a ni dawn a ni. Company lam chuan mipuite rawn chhaih lâwkin teaser an rawn tidarh tawh a, dealership thenkhatah chuan a book theih tawh bawk a ni.
TVS Ntorq hi a lo chhuah tirh phat atanga lei hlawh, ri kawi leh thum tha tak nei a ni a. A ke a lian thain Mizoramah ngei pawh an hralh tam viau a. Tuna a thar mawi tak, black edition thar, Race XP a chhuak tur pawh hi he scooter ngaina te tan chuan thu lawmawm tak a ni awm e.
Ntorq Race XP hi sawi tawh angin rawng dum chu thupui bera neihin mawi taka duan a ni a. A hmalam apron dum, a side panel leh mudguard pawh rawng duma mawi taka ruahman niin a graphic pawh mawi tak a ni dawn a, hmel thar mawi tak Ntorq-ah kan hmu dawn a ni.
He special edition-ah hian thildangah chuan tuna chhuak mek nen danglamna a awm vak dawn lo a. A khawl pawh a hman mek ang, 124.8cc single cylinder 3V oil cooled khawl a hman chhunzawm ang a. He khawl hian 9.25bhp power leh 10.5Nm torque a pechhuak thei a, riding mode pahnih Street leh Race a awm dawn bawk a ni.
Tuna chhuak mek aiin a rawng hi a dak nalhin a lang changkang (premium) bik dawn hle a. Tuna chhuak aiin a man pawh to deuh hret tura beisei a ni a, tuna chhuak mek hi Rs. 89,641 – nuai 1.06 (ex-showroom) man a ni a, hei ai hian tlemin a to deuh dawn tihna a ni a, a tona erawh a tam lutuk hmel loh a ni.