Sum a tam vanga khawvela player lar ni phakte pawhin an pan thin Saudi Pro League 2024/25 chu August 22, Ningani khan khelh tan a ni a. Entu mipui tlemte nen bul tan a ni.
Saudi Pro-League 2024-25 tan zan hian mipui 38,000 lenna King Abdulaziz Sports City Stadium-ah Al Wehda chuan Al Riyadh an mikhual a, he inkhel hi a hmunah mi 670 chauhin an en. Entu mipui 670 hmaa inkhelah hian Al Wehda leh Al Riyadh te hi 3-3 in an inhnehtawk.
Ningani zan vek khan team lian Al-Nassr chuan Al Nassr chuan mipui 25,000 lenna khelmual Al Awal Park-ah Al Raed an mikhual. Cristiano Ronaldo goal thunna inkhelah hian entu mi 8,951 chauh an awm. Ningani zana inkhel dangah Al Taawoun leh Al Fayha te inkhel phei chu a hmunah entu mumal an awm lo.
Tarlan tawh angin Saudi Pro-League-ah hian sum a tam a, player lar tak takin an pan hlawm. Khawvela footballer ropui ber zinga mi Cristiano Ronaldo chu Saudi Pro-League lama ringrawlh hmasa zing a mi a ni a. Cristiano Ronaldo bakah hian Karim Benzema leh Neymar ten an pan zui ve leh bawk. Nipui bazar inhawng mekah pawh player lar tak takte nen sawizawm an ni leh a, player lar an hip chhunzawm zel. Saudi Pro-League hian player lar hip chhunzawm zel mah se inkhel en turin mipui a hip lo sawt viau thung.