- Zoliansanga Tlau
Mizo thawnthu Thangsira leh Thangzaia thawnthuah chuan van lama awm unau nula hmeltha Lasiri leh Lasari te an awm a, an unauin tuiah an tla a, a nau zawk chu a vak chhuak thei mai a, a u zawk chu a chhuah ve theih loh avangin a nau zawk chuan vaukam atanga um zelin “Ka u, hleuh rawh, ka u, hleuh rawh” a ti zel a, mahse, a hleuh thei lo va. Chutih lai tak chuan thim a lo zing ta thut a, a nau chu Uleuhah a chang ta a, “Ka u, hleuh rawh, ka u, hleuh rawh” a tih chu hram nan a hmang ta a. Tichuan “U-leuh, U-leuh” a ti hlen ta a ni an ti.
Uleuh hram hian Mizote lunglen a kaitho thin a ni ang, hlaah pawh hmuh tur a awm nual. Lalhmingthanga’n a nupui
Rothuami tana kum 1982, August ni 12-a a hla phuah ‘Kar a hla, Duhlai mi u’ chang hnihna (October 26, 1983-a Lalsangzuali Sailo-in a thluk a siam sak)-ah chuan thingkunga mawi taka hram thin thereng a tarlan zingah uleuh kan hmu tel a; uleuh chu thereng nge a nih a, laiking thla nei a nih thu erawh tarlan a ni lo thung:
“Thuva indi, lamtluang mawitu,
Phengpheleng leh vahkhuai par tlan;
Siahthing zar bel zai tin rem thiam,
Uleuh, dawlrem, thlangkawrnu nen,
Di ngaih lunglen zai kan lo sa”
Pu Buanga leh Sap Upa te’n Dictionary an siam dun, kum 1898-a an tichhuahah chuan “U-leoh, (s.) the name of flying Lizard” tiin a inziak a (A Grammar and Dictionary of the Lushai Language (Duhlien Dalect), 1898, p. 219). Pu Buanga mimal Dictionary-ah thung chuan “U-leuh, n. the name of a flying lizard and also of a cicada. Both creatures have the same cry or call, resembling the name by which they are known. As but few people have seen both uttering their cry, some maintain that uleuh is a flying – Lizard only, and others are equally sure that it is a cicada only” (Dictionary of the Lushai Language, 1940,1975) tiin a ziak a. Remkunga chuan “uleuh – n. thereng chi khat, ‘u leuh’ ti ang deuhva hram thin” tiin a ziak (Mizo Tawng Dictionary, 1992, 2008, p.2641). James Dokhuma paw’n “Uleuh : He thereng hi nipui lai a hram, thereng hram mawi tak, ral khata a mi lungduh ko leuh leuh ni-awm tak hian a hram reuh a. Chu avang chu a ni ang e lunglen hla pakhat pawhin :-
‘Koh thiam uleuh sawm ka nuam mang e,
Hringfa zawngin kan ko kir tawh hlei lo’ng e;
Chun lo-in Rihtlang a pan hne hne'” tiin a ziak bawk (Mizo Tawng Kalphung,2006, 2011, p. 184).
Mizote’n uleuh kan hriat dan a inang lo tih a chiang a: thereng chi khat tih leh, laiking ang deuh thla nei tiin sawi a ni ber a. Laiking thla nei tia hriate hian a hram lai an hmuh thu leh an hriat thu an sawi thin a, hre chiang an inti viau bawk. Mi thenkhatte erawh chuan thereng chi khat ni ngeiin an hre ve thung. Eng pawh ni sela, tun tumah hian uleuh hi thereng chi khat nge a ni a, laiking ang deuh thla nei tih kan chhui dawn a ni.
Uleuh hi laiking ang deuh thla nei a nih thu hi Pu Buanga Dictionary-ah tih loh, ziaka chhinchhiah chhiar tur a vang hle. Pu Buanga Dictionary tih lohah chuan ‘Science Vision, 2009, Vol.9. No. 2, p. 57 – 72, April – June’ chhuak ‘Collection on the Saurian (Reptilia : Squamata) fauna around Aizawl city area with notes on the ecology’ tih thupui hmanga C Lalrinchhana, Lalnunsanga, Arti Kumari, Vanlalsawmi Renthlei, S Lalrintluanga, Lalrotluanga, Jerry Ramherliana leh H.T Lalremsanga te zir chianna kha a ni ang. Hetiang hian an ziak a:
Draco blanfordii Boulenger, 1885
Common Name : Blanford’s Flying Lizard
Mizo Name : Uleuh
Specimen Examined : MZU/ZOO/R – 172
“Uleuh te hi Mizoramah chuan laiking thlawk thei awm chhun nia hriat an ni rih. An taksa hnunglam rawng hi vutbuak niin rawng dum lamin a tial zeuh zeuh bawk thin. An thlaa rang (membrance) te hi rawng dum bial insi miah loin a tial thin bawk. A tlangpuiin an awr, ke hma invuahna bulah hian a rawng pawl lam bial deuh a awm thin. Lu te ret rawt, mit hma lam atanga hnar hmawr mit khur bial teh tlang aiin a tawi zawk. Hnarkua te hi hnar sirah awmin, an beng (tympanum)-ah phuhlip a awm a awm thin bawk. Lu chunga phuhlip/thlur nei (kneeled scale) te an intiat lo; hmui chhungah phuhlip 7 atanga 11 te a awm. An awrfual (gular sac) rawng eng dal te hi a langsarin a sei thin hle, an lu ai pawhin a sei thin. A pa hian a tukkhumah phuhlip thlukvum a nei ve a. An taksa hnunga phuhlip kil nei te hi an dula phuhlipte nen an intiat. An ke hma lam hi hma lama pawh marin an hmui hma lamah a lawr chhuak thei.
An chanchin tawi: Uleuh te hi kumtluana ram ngaw hring dup (Evergreen Forest)-ah khawsa thinin chhun lama chaw zawng chi (diunal) an ni. An thla hmang hian thing ler pakhat atangin thing dangah thlawk (fly) ni chiah si lovin an leu (glide) kai thin. Fanghmir hi an chaw pui ber nia ngaih a ni. An inthlah dan leh khawsak dan hi mumal taka zir chian a la ni lo.
An awmna ramte: China (Yunnan), Thailand, Malaysia, Myanmar, Vietnam, India Hmarchhak leh Bangladesh” tiin.
Zawhna awm thei ta chu uleuh hi laiking thlawk thei ni ta se ‘u leuh, u leuh’ tiin a hram thei ang em? Hemi chungchang hi Dr. H.T. Lalremsanga (MZU-a Professor leh Zoology Department-a Head) ka zawh chuan, ani chuan “Laiking uleuh an tih hi Draco ho an nia. An hram ri chhuak ngai lo Uleuh a hram an tih hi chuan thereng ni zawk awm tak a nia. Chuvang chuan uleuh hming hi thereng chi khat leh Draco hming intawm a nih ber mai chu” tiin min hrilh.
Flying lizard hi Agamidae family a mi a ni a. Agamidae family-ah hian species 550 chuang a awm thu Wikipedia-in a tarlang a. Species tam zawk hi dargon-te emaw dragon lizard-te emaw tiin hriat thin a nih thu a tarlan bawk. Laiking chi reng reng an anatomy han zir pawhin rimawi ang maia han hram ri chhuak tur chi an ni lo tih a chiang. Uleuh hram ri hre ve tawh ik tan chuan a hram mawi zia leh lunglen thlak zia kan hre ngei ang. Ri mawi ang maia mawiin, ‘u – leuh u – leuh’ tiin a hram hlerh hlerh a ni.
Uleuh nia mite’n an hriat Flying lizard chu ‘u – leuh, u – leuh’ tia a hram theih si loh chuan eng nge ni ta ang?
Pu Buanga’n uleuh chu thereng (cicada) chi nia mi thenkhatte’n an hriat thu a dictionary-ah a ziah tel thu kan tarlang tawh a. Chutiangin, Remkunga leh James Dokhuma te paw’n thereng chi khat nia an rin thu kan tarlang tawh bawk. A hmain uleuh hram hun tih vel leh uleuh hi eng nge a nih tih ka lo la chik tawk loh avangin a hram pawh hi ka lo ngai thla liam vel mai mai thin a. July ni 28, 2019 khan kan kawmchhaka theithat kungah Uleuh a rawn hram a. A mawiin lung a tileng hle. Thereng nge a nih Laiking thla nei tih ka han chian a, thereng ngei a nih tih ka chian thei ta. July ni 18, 2022 pawh khan kan inbulah mawi taka a hram thu ka chhinchhiah bawk.
A nih leh thereng ni ta se, ‘u – leuh, u – leuh’ tiin a hram thei ang em?
Thereng (cicada) te hi cicadidae chhungkua a mi niin Insect an ni bawk. He chhungkua a mi hram thin ho zawng zawng (Order Homoptera) te chuan thla pan te pahnih an nei thin a, langsar takin mit an nei bawk a, tin, mit mawlmang tak pathum an nei thin bawk. Cicada te hi a tlangpuiin 2 cm atanga 5 cm (0.8 inches atanga 2 inches) a lian an ni thin.
Thereng pa te hian ring takain an hram thei a. A chhanchu an An pum bulthut hnaihah hian thil rang fawn thei – tymbals an neih vang a ni tiin Britannica (http://www.britannica.com)-in a tarlang.
Hetiang a nih chuan uleuh kan tih hi laiking thlawk thei emaw laiking ang deuh thla nei emaw ni lovin, thereng chi khat a nih hmel hle. A nih chuan uleuh hi eng vanga laiking thla nei nia mi thenkhatte’n an hriat ve si ni ang. A chhan ni awma lang chu laiking thla nei te hi insectivorous (insect chaw a ring thin) an ni a. Fanghmir leh tlumpi an ei ber thin nachungin thereng te pawh insect an ni tho avangin chaw atan an veh thin a nga, a hramna bula an awm lai an hmuh thin avanga sawi an ni mai thei.
Eng pawh ni se, pawm zawk tur chu ka tarlang chiangin ka hria. Mahse, pawm thei tlat lo tan chuan Pu Buanga sawi ang deuha uleuh chi hnih : thereng chi khat leh laiking thla nei a awm tia hriat mai a tha ang. Hetianga kan pawm dawn a nih pawhin laiking thla nei a hram ri chhuak ngai lo tih erawh chian a tha ang. Min la hnial fo dawn a nih chuan, laiking thla nei (u – leuh, u – leuh tia) hram lai ka hmuha ka hriat phawt loh chuan ka pawm thei bik lo ang. Thoma anga a naka ka zen phawt loh chuan ka ti ve tlat dawn.
Uleuh hram hun chungchang han khel leh lawk ila. James Dokhuma chuan a lehkhabua thereng sawm (10) a tarlante chu :
Rengchal, Uleuh, Ngirthling, Dawlrem, Lalruanga – seluphan – zawn, Losul – thereng, Fanghma -tharko, Kawrnu, Chepchep, Vevu, Zuzi, Nipui – thereng leh Zo – kawrnu te an ni a. Uleuh chu nipui laia a hram thin thu a sawi bawk (Mizo Tawng kalphung, 2006, 2011, p. 182 – 185). Remkunga chuan “nipui – n. kum khata hun thenna pakhat, ni sat zual thin hun, March atanga May thla chhung hun.” tiin a ziak a (Mizo Tawng Dictionary, 1992, 2008, p. 358). Hetiang a nih chuan Uleuh hram hun hi July thla atangin a ni si a. James Dokhuma hian dawt a sawi em ni ang. Remkunga vekin “Fur – n. June thla atanga August thla chhung, ruah tui tlak tam lai hun” (Mizo Tawng Dictionary, 1992, 2008, p. 121) tiin a ziak bawk si a, nipui ni lovin fur laiin a hram zawk tihna a ni mai em?
J.F. Laldailova chuan “summer, n. nipui, fur, v.i. nipui tuar” tiin a ziak ve thung a (English – Lushai Dictionary, 1968, 2005, p. 489). Lalhmachhuana Zofa paw’n “thlasik (November – February), thal (March – May), Fur/Nipui (June – August), Favang (September & October)” tiin JF Laldailova thlawp zawngin a ziak bawk (Mizoram General Knowledge. 4th Edition 2000).
C. Thuamluaia’n ‘Zoram Nipui’ tih a ziakah chuan “Kum khata hun li thente zingah hian Nipui lai hi hun mawi nuam ber a nih ka ring. Fur lai hi chu ruahtui a tam thin em a. Khawlai len leh ram chhuahte a nuam lo va Zofate tan phei hi chuan hlo thlova tul em em hun lai a ni a, sawi lovah lo lum ta ila. Favang hun rei lote tih mai loh chu hun nghahhlelh em em dang kan nei lo…Fur khaw hnawm a lo reh a, favang hun nuam tak a lo thleng a, mahse, a ral leh thuai a, thlasik a lo ni a, a reh leh dawn nange maw aw! tih turah rei a rawn awh a. Mahse, January thla a lo thleng a, chhun khaw thiangah khua han thlir ila, thlaphanna zawng zawng a bo ta a ni. Romei chhum a lo zam tan den den a, chu chuan nipui a hla tawh lo tih kan pi leh pute a lo hrilh tawh thin a, keini pawh min hrilh a ni a; thang leh thar zel pawh a la rawn hrilh thin dawn a ni. Ni e, lungngai suh. Tuahpui leh Vau zawng an lo la vul leh ngei dawn e.” tiin a tarlang.
A khaikhawmna chu a chhiartute pawm danah a innghat e.