Nimin khan MNF party chuan Hnam Run chhung inkhawmna leh “Saizahawla Batallion” tih lehkhabu Lalrokhawma ziah tlangzarhna an nei.
‘Saizahawla Batallion’ lehkhabu hi Lalchamliana chuan tangzarh in, “Vawiinah hian thuthlung hlui a kir leh a hun a ni, Bible pawh hi thuthlung hlui tel lovin a kim lo a ni, kan hnam chanchin hmanlai changta te hriatchian a tul a, tunlai chanchin chauh chawivawng hi a famkimlo a ni,” a ti. Chama chuan, zalenna sual tute tel lovin MNF hi a kim lova, Mizo hnam history pawh hi a kim lo a ni, tiin, lehkhabu rotling buatsaih a ni chu lawmawm a tih thu leh lehkhabu buatsaihtute thawhrimna fakawm a tih thu a sawi bawk. ‘S’ Batallion member 70 martar-te pual hian minute khat ngawi renga dingin zahna lantirna neih a ni.
Lekhabu tlangzarh thlirlawkna neitu, Er, K. Lalsawmvela, Gen. Secy. MNF chuan, ‘Mizoram freedom movement’ hi lehkhabu hrang hrang ziak a awm tawh thu sawiin, fimkhur a ngaih thu leh, hnam history tur a ni tih hriat a tul thu a sawi a. Mithenkhat ‘TAI’ nei rán a thu ziak an awm bawk thu sawiin, “Saizahawla Batallion” lehkhabu Lalrokhawma ziah erawh hi chu thangthar lo la awm zel tur tan lehkhabu hlu tak a ni ngei ang, a ti.
Lehkhabu ziaktu Lalrokhawma chuan, vanglai hun ṭha, tha leh zung ram tana hlan a hliampui tuar leh martar-te chanchin ziah chhan sawiin; “zalenna sual tute mual an liam zel avang leh ziak a thu dah chu thangthar te tan a pawimawh em em a, hmanhmawh a tulna chuan a bukthlu a ni”, a ti. Zalenna sual hi Mizo history a hmun lailum chang reng tawh tur a ni, a ti bawk.
Chhung inkhawm leh lehkhabu tlangzarh inkhawm hi R. Laldingliana (Chairman ‘S’ Bn. Welfare) chuan kaihruaiin, hunserh hi R. Lalnundanga (Vice Chairman ‘S’ Bn. Welfare) in a hmang a ni.