Nimina ZPM Party Office chhung inkhawm huna thusawitu B.Lalchhanzova, Minister chuan, “Retheite ngaihsaktu party kan nihna hi Ration Card kan thlanna hmang hian lantir kan tum a, ngaihsaktu nei ve loten rei tak atanga ZPM min lo nghahna chhan pawh a ni,” a ti.
Food Civil Supply & Consumer Affairs Minister B Lalchhanzova chuan, “Aizawl khawpui chhungah Ration Card 73,110 a awm a, mihring 3,12,125 zet Ration Card-ah an inziaklut a. AAY kan tih Card eng-ah mihring 9,129 awmin card 3,286 a awm a, Card pawl-ah mi hring 1,35,178 awmin Ration Card 31,965 a awm bawk a, Card var-ah mihring 1,67,746 awmin ration card 37,831 a awm bawk. Tunah hian Aizawla veng 83-ah Retailer 153 an awm mek a, Food Security Committee-ten an zirchiang ang a, keinin DCSO kaltlangin Food Security Committee-te an dik tawk em tih kan lo zirchiang leh dawn a ni. Mi rethei hlamchhiah an awm em tih chu kan thupui ber a ni dawn a, a titha lo veng an awm em tihte thlengin kan lo enfiah dawn a, a teh dan tur pawh ka duangfel vek tawh a ni. A ti tha lo veng leh titha vengte pawh kan puang hial mai thei a ni. Rethei ngaihsaktu party kan nihna hi he Ration Card kan thlanna hmang hian lantir kan tum a, ngaihsaktu nei ve loten ZPM rei tak atanga min lo nghahna chhanna tur a ni. Retailer lawman te pawh pawsa 50 atangin Rs.1.50-ah kan tisang dawn a, Aizawl bikah chuan hei hi October atangin tan hman kan tum. Retailer ten an buk dik tur a ni a, buk dik zalenna ram nih kan tum. Mualkhang Botling Plant- te pawh theihtawpin hma kan la mek a, a hungna tur atan Rs.23 cr. tender chhuah a ni tawh a, IOCL lamin Land Development atan tender chhuah leh thuai an tum a, IOCL Oil Depot pawh chak taka hmalak chhoh niin HPCL pawhin Oil Depot turin Vairengte lamah chetlak an tum mek bawk a, a hlawhtlinna kan hmuh chhoh thuai kan ring a ni,” a ti.
Chhanzova chuan, “India ram sawrkarin kum 2011 chhiarna angin Mizorama chhungkua 7,06,296 te Food Security hnuaiah min rinlut a, hei hi kan sawrkar hma atang tawha kan vei em em a ni a, chutah chuan card eng, card pawl leh card var nei an awm a. Aizawl khawpui chhungah card var nei si mirethei tak tak, an awm avangin Food Security Committee kaltlangin endik hna a kalpui a, kan tum ber chu mi awm theite leh mahni khamkhawp buhfai ei theite buaipui lam ni lovin mirethei, sawipuitu nei lo, an chanvo tur ang chang pha lo te hmaih palh an awm ang tih kan hlau a, chu chu kan thupui ber a ni. Hun hmasa lama National Food Security Committee an din tawh pakhatmah ti danglam lovin hma kan la mek a, chuta buaipuitu tam ber 90% chuang chu MNF Local Council-te an ni. Mi tam tak chuan Local Council thlan a nih hnuahte ennnawn chauh awm an ti hlawm. Mahse kalphung tharah chuan MNF local Council pawh nise kan ring ngam a, an harh thar ve turah pawh kan ngai. Mizoram mipuite hnena kan sawi duh chu Card eng nei tur chu mi rethei bakberh kan tih ang te kha an ni ber a, Card pawl chu dinhmun harsa, rethei kan tihte kha niin BPL aia chung dinhmun harsa tak tak si, mahni chhungkaw kham khawp leina tur harsatte an ni a, tunah hian kan Chief Minister hmalaknain Non-NFSA hnuaia kan luh belh theih nan Union Minister Pralhad Joshi pawh a chennain te ka zuk hmu tawh a, min lo nghak ru a tih angina beiseina sang tak kan nei a ni,” a ti a. Land Revenue & Settlement Minister ni bawk B.Chhanzova chuan, “Hmalakna tur a tam tam em em a, he department ka chan hnuah theihtawp kan chhuah nghal a, tunah chuan kan kalphung a mumal tawh hle a, kan officer-te an phurin kan hawiher leh kal tum dan hi an hrechiang tawh a ni. Central lamin min beiseina a sang em em a, mahse kan kalphung kha a lo Old Model deuh tawh avangin tunah chuan kalphung thar hnuaiah changkang leh dik bawk siin kan kal chho tan mek tawh a, chutiang bawkin Gas lamah hmasawnna kan hmu chho zel dawn a ni,” a ti.
Supply Minister chuan, “ZPM Party hi na tak taka beih ni mek mase kan inlungrualna a nghet tual tual zel a, thawhhona a tha a, duhsakna avanga thurawn leh zilhna kan dawn zozaite hi a lawmawm. A lawmawm ber mai chu kan inti neitu em em vek mai hi a ni a, hei hi ZPM Party kan danglamna bik a ni. Party sawrkar kan ni lova, mitin huap kan nih dawn avanga vawiin dinhmun thlenga sawrkarna chang thei kan ni. Sem leh tawktarh avangin mipuite an a duh tawh lova, an vote zawn danin ram dinchhuahna lam a hawi tawh lovin party kaltawhte kha mipuiten chawlh an pe a ni. Dam chuan kum 2028-ah kan inthlang leh ang a, MNF leh Congress-ten sem an zuar tawh lo tur hi a lawmawm. Min beihna ber chu ZPM-in eng nge an sawi sual tih vel a ni a, hei bak politics an nei lo. Mizoramah party lian pathum a awm theih loh tih hi kan sawi a ni lova, MNF leh Congress ho sawi thin a ni. Chuti a nih chuan opposition party pahnih zingah hian tu zawk nge ral ang? ral tur chu an awm a ni! Vawiinah hian Minister leh MLA-ten kan ti dik lo a nih chuan party worker-te pawh hian kan lawm loh zawng sawi hlauh vanga min fak a ngai lo, chu chu kan sawrkar mizia atana ka duh a ni. Sawrkar tawhte tihsual lian tak chu an sawrkar chhungin an inhmuchhuak hman lo thin kha a ni a, an harhchhuak hman lo zel. Tlak tawh hnua mipuite hnena ngaihdam dil reng mai hi kan kalphung tur a ni lo,” a ti bawk.
Nimina chhung inkhawm hi VL Zaithanzama, MLA, Vice President ni bawk chuan a kaihruai a, R.Lalchawia, PAC chuan hunserh hmangin Party President Lalliansawta chuan ZPM-ah mi 8 a lawmlut a, K.Laltluangkima, Spokesperson chuan thu a sawi bawk.