Vanlalhmuaka, BJP Mizoram State President, BJP Mizoram MLA pahnih; K. Hrahmo leh Dr. K Beichhua te leh State hruaitute’n Om Birla, Hon’ble Lok Sabha Speaker chu ningani zan khan Raj Bhavan ah kawmin Mizoram politics dinhmun leh hmasawnna chungchang an sawipui.
Vanlalhmuaka leh BJP hruaitute chuan Om Birla hnenah Mizoram politics dinhmun te, hmasawnna hna state sorkarin a kalpui mek dan te khunkhan takin an sawipuiin, Hmuaka chuan tun hnaia Mizoram chhunga ruah sur nasat avanga kawng chhiat dan te, Cyclone Remal aṭanga tui leh eng chungchangah mipuiin harsatna an neih dan te, tun hnaia tuialhthei leh buhfai man tihsanin mipui mimir a nghawng dan turte, sorkar hmasa aṭang tawha vawiin thlenga PM Scheme kalpui mumal a nih loh dan te, PM Scheme hi State-a sorkar apiangin party vote zawnna atana an hman dan te, tun ang reng renga Mizoram kawng chhiat avanga mipui tawrhna a la awm ngai loh thute Om Birla hi a hrilh a. Heng bakah hian Central Institution, a bikin NIT te, Vety College Selesih te, Horticulture College te, Thenzawl te, RIPANS-a khum 100 awmna hospital siam mekte, Mizorama 4-lane Vairengte to Aizawl siamna kawnga harsatna awm mekte, Rel kawng chungchangte ngun takin Pu OM Birla chu an sawipui a. Hetih rual hian MADC ah BJP in MLA pahnih leh District Council sorkar an neih dante leh state sorkarin fahrawn ang maia a enkawl dan te Om Birla hi an sawipui a ni.
Om Birla chuan BJP Mizoram State President leh a team-te thu thlen chu ngun taka ngaithlain a chhinchhiah mai bakah Mizoram a chhuahsan hma ngeia ziaka amah pe tur leh a ṭul anga BJP Mizoram State hruaitute thil sawi chu New Delhi ah bawhzui a nih theih nan State President chu ziak ngeia a hnena pe turin a hrilh a, BJP hmasawnna turin, Mizoramah Sabke Sath, Sabke Vikas (Mi tin tan an mamawh ang hmasawnna) a thlen theihna atan theihtawp a chhuah a tur thu, a sawi a. BJP tel lohna sorkar awmna apiangah hmasawnna a chak loh thu leh BJP sorkarna apiangah hmasawna a kal ṭhat thu Speaker chuan sawiin, Mizoram mipuite pawhin tunah chuan an hre chho ṭan mek nia a hriat thu a sawi a, BJP chu nasa taka Mizoramah hian neksawr nimahsela, MLA 2 lai BJP in kan neih bakah, MP election ah vote 6.82% lai kan nei thei hi BJP hruaitute thawhrimna vang a nih thu sawiin, BJP Mizoram leh Mizoram mipuite tan theihtawp a chhuah tur thu Om Birla hian Hmuaka leh BJP hruaitute chu a lo hrilh a ni.
Om Birla chuan New Delhi-a zin turin BJP Mizoram hruaitute chu sawmin, Ministry hrang hrangah an thil sawite chu lo bawhzuipui a tiam bawk.