- Reuben Lalnunthara Hnamte
Kan tân Naupang a lo piang a, Fapa pêkin kan awm ta a; rorêlna chu a kokiah a chuang ang a: a hmingah chuan Maka, Remruattua, Pathian Chaka, Chatuan Pa, Remna Lal, an ti dâwn si a. (Isaia 9:6)
Lal Isua kan tana he khawvela alo pianna hun christmas chu kan lo chuangkai leh ta reng mai. christmas kan hman chen a inang lova, kan hman dan lah a inang na hek lo. A thenin nawmchen nan an hman laiin a thenin Pathian Thlarauva khah nan leh Pathian nena an intawh niah an lo hmang bawk a. A thenin lusun nan an hmang a, thenkhatin lawmna ni atan an hmang bawk. Tun huna kan thupui leh kan sawi tur ber chu; “Ramna Lal apiang ta” tih hi a ni. Thlasik hun alo thleng a, boruak han vawt deuh var maite, boruak thiang kak maite hian ati christmas bik riau hian a hriat a. A ni tak a dik leh dik loh lam ka sawi dawn lo va, engtia lo zichhuak nge a nih lam pawh hi sawi ngai ka ti lem lo. A pawimawh ber chu he christmas lo thleng hian kan nunah Isuan Lalna a chang em tih te, remna Lal a nih angin midangte nena inremna hun atan kan kalpui em tihte hi a ni. Kan lo ngei em em thin te, inbe hleitheilo leh lo inhmelmak tawh te, chhungkua inrem thei tawh lote inremna hun atan hman avan pawimawh em!
PATHIAN LEH MIHRING INKARA INREMNA : Pathian leh mihring inkara inremlohna chu Lal Isua lo pianna hian a rawn thlakthleng ta a. Mihringina Pathian pawi a khawihna hi a thukin ngaihdam theihloh hiala ngaih mai theih a ni a. Nimahsela, Pathian hmangaihna thuk leh a khawngaihna ropui tak chuan Amah nena kan inremna tur kawng zawngin a fapa duhtak mai chu he khawvela mihring bawhchhiatnaa khatte chu inremlehna kawng a rawn zâwng a ni. Kum 33 chhunga Lal Isuan a tawrhna hi mihringte ngaih chuan thil theihloh tluk nimahsela, apa thuawihin chhel taka tuarin remna kawng a rawn hawng ta a. Pathian chu a fapa thuawihna leh a tuarnaah lungawiin, fapa Isua neitu leh ringtu apiangte tana vanram luhna kawng hawnsakin, a fapa ringtu apiangte chu ngaihdamin kan awm ta a ni. Hremhmun rapthlak tur zia ngaihtuah hian Pathian hnathawh ropuizia leh Isuan chatuana nun kan neih theihna tura a tawrhna rapthlak zia hi ngaihzam mai chi a ni lo.
Remna siamtu-Krismas : Chrismas avanga khawvela thil thleng chhinchhiah tlak hi sawi tur tam tak a awm awm e. Khawvel Indopui pakhatna (World War I-1914) lai khan France ramah British sipai leh German sipaite chu an inkap nasa mai a, an ram chhan nana lu chhum ban chhum huam tak meuhin an inep a ni. Hemi kum vek chrismas lai pawh hian an indo chu a la tawp mai loh avangin an inpe chhunzawm zel a, chrismas ni tak chuan mak tak maiin sipai ralhrat leh rothap pui pui maite chu chrismas zungzam chuan a zem tuiral ta tlat mai a. Ranthlenga nausen tlawm tak chuan chung sipai rilru sak pui pui, thisen chhuak chaka sahal mekte chu a chhun tui ta zawih zawih mai. Sipai pakhat chu a insum zo lova, an riahbuk atang chuan chrismas hla a rawn sa chhuak ta phawng mai, chu sipai khawhar hla sak chuan an ral lawka an hmelmate thinlung a dek ta tlat. An hmelma zing atang chuan an rawn zawm ve ta mai a! Chu darkarah ngei chuan nunna inlaksak tuma inepte chu remna palai Lal Isua chuan suihzawmin kut thingin an inchibai a, remna lal Isua avangin hmelma an lo inrem ta.
Hemi hnu ah pawh hian Germany’s 133rd Royal Saxon Regiment leh Britain’s Seaforth Highlanders te chuan chrismas niin football hmanga inelna hlimawm tak an nei zui a, Germany lam hian 3-2 in an hnen nghe nghe a ni. Hmelma te chu inremna hruihruala suihzawmin an lo awm ta. Heng zawng zawng thlentirtu chu chrismas a ni. Christmas ni a dik leh dikoloh lamah buailo ila, he Christmasin a tum ropuizia zawk hi I ngaihtuah ang u.
Midangte nena inremna : Lal Isuan “ Khawvelah hian rem lentir tura lo kal emaw min ti suh u; rem lentir tura lo kal ka ni lo va, khandaih lentir tura lo kal k ani zawk” (Matthaia 1:34) alo ti leh daih mai bawk si a. Pathian thu hi a inkalh emaw tih mai tur a ni a. Mahse, Isuan a tum ber zawk chu; mi tupawhin min lo huain min rem lo mahsela, keini erawh chuan remna thinlung kan put a, midangte huatna leh tihchhiat duhna paihthla a, kan thinlung hi a thianghlim a duh a ni. Miten min lo haw viau pawh ni se, kan huat ve duh tlat loh chuan hnehin an awm nge nge thin. Hmanlai atang tawhin ram leh ram induna kan hre tam hle a. Tunah pawh hian ram hrang hrang indona, Ukraine leh Russia te, Israel leh Hamaste indona kan hre cham chi a; Burma ramah tualchhung buaina, Manipurah pawh state chhunga inremlohna lian tak kan hre reng a ni. Ram chak zawkin ralthuam tha nen anmahni aia ramte zawkte lo hneh pawh ni se, an thinlung erawh an hneh miah thung lo. Isua erawh chuan tlawmna nun nena mite thinlung hneh hi a tum ber a ni thung. Tlawmna nun nena mite thinlung hneh chuan hnu leh a nei lova, mi dotute kha an rilru leh taksa nen hnehin a awm thin a, chu chu Isuan a tum ber a ni.
He christmas lo thleng hian chhungkuaa inremna thlen sela, nupa inkarah tlawmzawk nih hreh lo va inremna thlen se; midangte nena kan inkarah inremna thlen sela a va ropui dawn em! Midangte nena kan inremna tur chuan keimahni ngei hi kan inhneha, midangte huatlohna leh remna thinlung kan put tlatna hian Christmas ina a tum chu a rawn tihlawhtling dawn a ni.