Mizoram Youth Commission (MYC) Chairman Dr Vanlaltanpuia, MLA chuan nimin khan State Central Library chhunga IAS Book Corner siam a hawng a, All India Services-a Mizo thalaite an tlin hleih theih loh chhan zirchiang tur team din an tum thu a sawi.
Dr Vanlaltanpuia chuan Mizoram atangin All India Services-ah inziak tling an awm lohna a rei tawh thu leh sorkarin a vei thu a sawi a, “State dang thalaite central services-te an inziak tling zut zut a, Mizoram atang erawhin tling an awm hlei thei lo a, a chhan hi hriat chian a tul kan ti a, zirchiang tur team din tum a ni,” a ti.
MYC chairman chuan Mizoram atanga All India Services-a inziak tling an tam zel nana hmalakna chu MNF ministry thil tuipui ber zinga mi a nih thu sawiin chief minister leh deputy chief minister-in MYC hmalakna chu an tuipui a, IAS book Corner pawh an ruahmanpuinaa siam a nih thu a sawi.
Sorkarin Mizo zingah IAS emaw, central servies danga inziak tling an awm tam theih nana phur taka hma la a, IAS Coaching Academy-a lutte sum tak senga a sponsored laiin thalai zingah central services-a luh tumna nei an tlem thu sawiin, “IAS Coaching Academy-a lut tur kan han thlanah pawh hian dil hi an tam lo thin khawp mai,” a ti.
Nikum lamah IAS Coaching Academy-a lut tur mi 20 an sponsored thu leh kuminah ti pungin mi 40 sponsored an tum thu a sawi bawk.
IAS Book Corner atan hian MYC chuan State Central Library hnenah Rs nuai 10 a pe a, lehkhabu eng emaw zat lei tawh niin a tul anga lei belh zel tum a ni.