Aizawl: Revenue Minister B Lalchhanzova chuan sorkar pisa dawr kher loa ram teh duhten awlsam leh rang taka an ram an teh zung zung theih chu sorkar duh dan a nih thu a sawi.
Ningania Land Revenue & Settlement Conference Hall-a e-Ram software puala training buatsaih hmanpuitu, revenue minister chuan survey firm te chu ram teh muang lutuk thin avanga mipui harsatna sukiang tura an rawih chhan a nih thu sawiin, “Kan ngaih pawimawh ber tur chu mipui harsatna sutkian hi a ni a. Kan hmalakna thar hian mipui a tichi-ai tur a ni lo,” tiin, ram teh duhten sorkar pisa dawr kher loa awlsam leh rang taka an ram an teh zung zung theih chu sorkar duh dan a nih thu a sawi a. Zoram mipuite chu he hmalakna hi phur taka tawiawm theuh turin a sawm.
Revenue minister chuan surveyor indaih loh vanga mipuiin minister thlenga ram teh hma tura an dawr thin chu tihbo nana firm-te hi thawk tura chhawr (empanel) an nih thu sawiin, firm-te chu mipui beisei tibeidawng lo turin a chah bawk.
Training kaihruaitu LR&S Director R Lalthazuala chuan department inruahman dan chuan January, 2025-ah chuan e-Ram hmanga online veka application hi dawn tawh tum a nih thu leh tuna dilna dawn tawhte hi chu manual-a dispose an la nih phawt tur thu a sawi a. Software hman tan a nih hian vawi leh khatah a fel nghal duak theih loh thu leh siam that ngai laite siam tha zung zunga empanel firm te pawh e-Ram-a an tih tur leh thiam tul chinte bel hle turin a chah a ni.