Aizawl: Govt. Serchhip College Campus-ah nimin khan New Serchhip kum 50-na lawm a ni a. Chief Minister Lalduhoma, bialtu MLA chuan khuallian niin a hmanpui a, jubilee lungphun a hawn bakah souvenir a tlangzarh.

Chief minister chuan kum 50 chhungin New Serchhip chu village council pahnih leh branch YMA pali ni khawp hialin a thang lian a. Zirna lamah college thuthmun niin sorkar hmun pawimawh tam tak an awm bawk tih sawiin, “Thang lian zel turin ram rem tak a nei. Heng hi malsawmna a ni. Vawiina khawtlang hruaitute hian kum 50 dang lo kal leh tur hmu phaka kan inbuatsaih a tul,” a ti.

Khaw tam takin harsatna an tawh chu thliarkar rilru a ni tih sawiin Lalduhoma chuan, “Veng bil ringawt te, thler khat ringawt te, veng tepen pakhat ringawt te tana thapui thawha bei duh pawl hi kan lo awm leh mai thin. Hetianga thliarkar rilru zim lutuk neih hi hmasawnna daltu a ni,” tiin, infrastructure pakhat hian khaw tam tak mamawh a pe thei tih a sawi.

Bialtu MLA chuan tourism tihhmasawnna kawngah hian hmunhma a neih that avangin Serchhip leh a chhevel atangin bul tan an tum tih a sawi a. Tunah pawh Paragliding International championship neih mek a nih thu sawiin,, khualzin hip thei hmunhma an neih te duat a, an mizia hrim hrim pawh mi dangte hip thei zawnga nun tum turin a chah bawk.

New Serchhipah hian April, 1974 atang khan Vanlalsiama leh a nupui, V. Rosangi te chu an fate pathum nen in sain an awm tan a. Kum 2023-a an inchhiar danin chhungkaw 980 vel, mihring 4,500 vel an cheng mek a ni.

CM thu sawi dangte

1. New Serchhipah hian handholding chhawr thei mi tam tak rawn chhuak ula, kan veng hi thil siamna hmun, tharchhuahna hmun, production centre tha takah chantir i tum ang u.
2. Kum tela leilung chhiatna a tam tial tial avangin heng chhiatna laka him ngaihtuah chunga in leh lo kan din a ngai. Khaw chhung inkalpawhna kawng te pawh kan ruahman lawk tur a ni.
3. Mi fel pakhat avangin khawtlang kan inchhuang thei a, misual pahnih khat lek hian min tihmingchhe hle thei bawk. YMA leh NGO dang te lo tang ula, a tul ang zela kan Police te nena thawk hovin, khauh takin hma lo la ang che u. Ruihhlo vanga harsatna te hi kan pumpelh vek seng lo a nih pawhin na takin kan nawr tawm tlat tur a ni.
4. Zawlpui chhung inkalpawhna te, Kikawn atanga Hmar Veng inkalpawhna lane kawng thar te, Zawlpui atanga Zote kawng te, Paragliding take off kawng te, Mat phase 2 irrigation te, Thenzawl Fodder farm tha zawk te, Thenzawlah vek hian Artui Farm te, Vantawng Rope Way te kan thawk dawn a. Hmawngawn lui chhuah bulah Mat khu khuah kan tuma, Mat kama leilet siam theihna ram te chawm vek thei tuilak neih kan tum. Serchhip hian hmasawnna a hmu zel dawn.