Khawvel huap amatuer boxing pawl thar World Boxing chuan member 60 an nei tawh tih an sawi a, International Olympic Committee (IOC) pawmpuina an hmuh theih ngei an beisei.
Khawvel huapa amatuer boxing thuneitu ni thin International Boxing Association (IBA) inrelbawlna a fel tawk loh avangin buaina a awm a, IBA thlaka thuneihna changtu nih tumin nikum April khan World Boxing din a ni a, Russian kaihhruai IBA hi 2019 khan hrem lailawk a nih hnuah nikum June khan khawvel huapa thuneitu a nihna hlihsak a lo ni tawh a ni.
World Boxing din a nih atangin boxing-a ram langsarten an zui nghal a, USA, England, Germany, Japan, South Korea te bakah India pawh a inziak lut tawh a, tunhnaiah ram hrang panga – Cambodia, Dominican Republic, Jordan, Myanmar leh Palestine boxing federation-ten an pawl an zawm fel tih President Boris van der Vorst chuan a sawi a, an hnuaiah mumal takin ram hrang 60 an inziak lut tawh a ni.
Dutch pachal Van der Vorst chuan tun thla 12 chhungin World Boxing zawm thar an thahnem hle a, tunah ram hrang 60-in an zawm tawh a, boxing khawvel kalphung thlak duhna a lian hle tih tichiangtu a ni, a ti.
Ram hrang hrangin World Boxing an zawm chhan chu Olympic hnuaia mumal taka boxing kalpui an duh vang a ni a, boxing-in hma lam hun tha leh nghet a neih theih an duh bawk a ni, a ti.
IOC-in IBA nena an thawh dunna a tihtawp avangin Olympic Games hnuhnung pahnih Tokyo leh Paris-ah a hranpain boxing inelna a kalpui a, thla 19-a upa World Boxing chuan IOC pawmpuina hmuh theih an inbeisei a, an hlawhtling a nih chuan Olympic Games-ah boxing inelna an kalpui thei dawn a, Olympic atanga boxing paih tumna awm reng pawh an sut kian theih an inbeisei a ni.