Kum nga lai an awl hnuah National Security Advisor Ajit Doval leh China-a a nihpui, Wang Yi te chu Beijing-a Special Representative Dialogue-ah an inbe dawn a, hei hian km 3,488-a thui an inrina, Line of Actual Control (LAC)-a boruak muanawm leh inremna a ken beisei a ni.
Doval leh Wang te hi December, 2019-a an inbiak hnuah kha chuan an inbiakin ramri buaina chin felna tur lam an sawi ngai tawh miah lo va, ram pahnih inkungkaihna thil dang an sawi thin.
Prime Minister Narendra Modi leh President Xi Jinping sorkarte an inhnimhnaih leh thar karah Doval-a hi Thawhlehni khan Nilainia SR inbiaknaa tel turin Beijing a thleng a ni.
October 24-a Kazan BRICS meeting-ah khan ram pahnih hotu lu berte hian East Ladakh-a ramria an inmil lohna lai, Demchok leh Depsang Bulge atanga an sipaite ve ve insaseng turin an lo inrem tawh a. Tih dan thin pangngai pel lova ramria patrol chauh tawh turin an inrem a ni.
Indian Army leh Chinese PLA hi heng hmunah hian May, 2020-a an intihbuai vak atang khan an patrol ngai tawh lo ve ve a. Doval leh Wang te inbia hian ramria muanna nghet zawk a awm zui zel theihna tur leh an insaseng tawhna baka tawlh zel tura tih ngaite an sawi dun leh dawn a ni.
May, 2020 hnuah khan lehlam lehlam sipaite hian Western Sector-a Karakoram Pass atangin Eastern Sector-a Kibuthoo-ah an hmanruate hi an sawn hlawm a. PLA hian Xi-a a vawi thum nana president a nih leh hma thleng khan an hmanraw lian deuhte nen Eastern Sector hi an pan a ni.
Tunah erawh chuan heng hmun hi sipaite hian an chhuahsan leh ve ve tawh a, Wang leh Doval inbia hian boruak tha lehzual a hrin beisei a ni.