Thawhtannia MNF party in Hnam run kharna an neih tum khan an president Zoramthanga chuan sorkar tharah sum leng vak a tlem thu a sawi a, a dik viau niin a lang.
Sorkar thar hian inremchen kum a puan nghal avangin sorkar sum luangrual tur tam tak chu a reh ve hawkin a lang a, chutihrual erawh chuan sum leng vel leh che tha lo avangin mipui tam takin harsatna kan tawk thung.
Politics hre deuhte tawngkam takin tuna kan sorkar hrawn mekte hi budget vawikhat pawh la pharh lo, sum enkawl ngai eih lo an ni hlawm a, hunpuiah hian mipui hnenah sum leng vak a tlem miau avangin mipui tam zawk chu bazar tur pawhin an kal chhuak meuh lo niin a lang.
Kan dinhmun hian tunah rih chuan retheihna kawngah min la hnuk mek zel a, hunpui dawnah pawh sum leng vak a tlem a nih chuan kumthar kan hman chhoh tur pawh hi pahmeipa tan chuan ngaihtuahna tithui tak a ni chho ta vawng vawng mai.
Khawpuiah pawh hian nitin eichawp zawng tak meuh meuh chhungkua hi kan tam hle a, hengte hnena thleng phak tur hi sorkar hian sum lentir dan hi chu engemaw zawng tala a ngaihtuah a ngai a ni.
Central atangin a khat tawkin sum sanction kan la dawng reng a, a kal danphung engmah danglam a awm em em rih lo. Chutihrual erawh chuan state hian kalphung thlak danglam vak vak lo hian mipuite hi sum leh paiah min vur mai se la, kan thawh tawk mil kan hmuh theih nan leh kan harsatna chinfel zung zung a nih theihna tur hi min ngaihtuahpui mai se a fuh rih berin a lang.
Fin lutukte hi ram hruaina kawngah hi chuan a finthlak ber lohin a lang a, hriat lutuk pawh a hrisel ber lo mai thei. Mizoram mipui hian mil tawk leh mamawh tawk kan nei a, chumi mil chuan min enkawl mai se a thain a rinawm.