Maoist-ten Chhattisgarh-ah a pasal, engineer an ruk bo chu chhuah tura a ngen hnuah pawh chhuah a nih loh zel avangin Sonali Pawar-i chuan a fanu naupang nen Abujhmad ramngaw, Maoist tamna hmun luhchilhin a pasal an zawng dawn.
Maoist-te hian engineer Ashok Pawar leh a hnuaia thawk, Anand Yadav chu Thawhlehni tlai khan an chhuah tawh a; mahse, Sonali Pawar-i chu ramngawah a la awm a. Chanchinbumi leh police-in an zawng zui mek.
“Ashok Pawar leh Yadav hi Kutru, Bijapur-ah an awm mek tawh,” tiin Additional Superintendent of Police (ASP) Pankaj Shukla chuan Nilaini khan a sawi a. Sonali pawhin Kutru hi a thlen ve theih thuai beisei a ni.
Tual chhung chanchinbu pakhat chuan video siama a pasal chu an fanute avanga chhuah tura Maoist-te a ngen hnuah pawh an chhuah mai loh avangin Sonali Pawar-i hian Chhattisgarh-a Bijapur leh Narayanpur district-a Abujhmad ramngaw chu a luhchilh ta a ni.
“Sonali-i hian heng lai vela chengte leh chanchinbumite puihnain Abujhmad ramngaw hi Bijapur leh Narayanpur inrina atangin a lut a ni,” tiin Bijapur-a Hindi tawnga tihchhuah ni tin chanchinbua thawk pakhat chuan news agency PTI a hrilh.
Sonali Pawar-i hian an fanu naupang ber, kum hnih leh a chanve vel mi a hruai a. An fanu upa zawk, kum nga mi erawh an chhungte bulah a dah a ni.
Sonali Pawar-i hian a pasal thawhna, construction firm-a an thawhna atangin February 11 khan a pasal hi ruk bo a ni tih a hria a ni.
“Sonali, a fanute pahnih leh an chhungte dang hian Pathianni khan Bijapur an thleng a, Bedre a pan zui leh a. Ramhnuaiah la awmin a pasal an kawlna, Kutru police station lam a pan mek,” tiin chanchinbumi chuan a sawi.
Chanchinbumi hian Ashok Pawar-a ruala chhuah, Yadav-a pawh a hmu tih a sawi a. “Yadav-a hian Naxal-te hian engineer nen hian kan in kan thlen theih nan Rs. 2,000 ve ve min pai,” a ti.
Police-te chuan Ashok Pawar-a hi a la thlabarin enkawl a la ngai hle tih an sawi niin chanchinbumi hian a sawi.
Pawar leh Yadav-a hi mi mal construction company hnuaiah thawkin Bedre-Nugur khua, Bijapur district-a Indravati lui chunga lei dawh hna an thawhna atanga ruk an ni.
Pawar chhungkua hi Madhya Pradesh lam mi an ni.