Mumbai vaukama Indian navy speedboat-in passenger phur a hnawlnaah mi 13 vel thi an awm niin thuneituten an sawi.
Thi zinga pathum hi navy mi leh sa an ni a, mi 100 chuang chhanchhuah an ni tih Maharashtra Chief Minister Devendra Fadnavis chuan a sawi.
Online-a video thehdarhah chuan speedboat hi nasa takin a tlan kual hnuah lawng hi a su ta a, a let zui ta niin a lang.
Indian navy chuan ‘engine fel tawk lo’ tiin an sawi a. Chhui zuina tur thupek chhuah nghalin insutna thlen chhan tak hriat theih an tum dawn niin tual chhung chanchinbute chuan an sawi.
Mi mal ta lawng hi khualzin tlawh nasatna hmun, Elephanta Caves pana kal a ni a, Nilaini tlai dar 4:00 vel khan speedboat hian a su ta a ni.
Mi pahnih chin hriat loh la awmte chu Ningani chhun lai thleng khan zawn an la ni.
“Engine enchhin mek navy craft chu thunun zo lo palhin passenger phur lawng nen an insu,” tiin navy chuan thu an chhuah a, ‘chhiatna nasa tak’ a thleng chu pawi an tih thu an sawi bawk.
Gautam Gupta chuan The Times of India chanchinbu hnenah speedboat hi stunt a ti emaw a ti a, lawng bathlar atangin a video pawh a la a, a su ta bur niin a sawi.
Passenger dang pakhat chuan minute 15 zet a inhleuh hnuah lawnglengin a chhanchhuak niin a sawi.
Chhanchhuah hmasak zinga mi, Arif Bamane chuan hmun tin hawiin tanpuitu zawnga a au kual thu a sawi.
An hun tawn chu a rapthlak tak zet tih a sawi a, a chuang zinga tute mahin mumal takin an thil tawn dan tak sawi thei pawh an awm lo.
Dam chhuakte chuan lawnga thawkte hian chhiat an tawh hnuah awm dan tur engmah an hrilh lo niin tual chhung chanchinbhute hnenah an sawi a, an himna turin anmahniin an bei tawp niin an sawi.
Navy thuneitu pakhat chuan lawng leh speedboat tlanna tur chin hi mumal takin siam vek a ni a, an insut buai lohna turin hmun zau tak awl a awm niin BBC a hrilh.
Speedboat hi khawmuala hnuhchhuah a nih hnuah thil thlen dan kimchang chu an hriat theih an inbeisei tih a sawi bawk.
Prime Minister Narendra Modi chuan chhiatna tawk chhungkuate a tawrhpui thu leh pawi a tih tak zet thu a sawi.
Rs. 2,00,000 theuhva ral an nih tur thu sawiin hliam tuarte chu Rs. 50,000-a ral a nih tur thu a sawi bawk.
Hetiang hi thla khat chhunga a thlen vawi hnihna a ni ta a. November 22 khan Goa-ah tuihnuailawng leh sangha manna lawng an insutnaah mi pahnih an lo thi tawh bawk.