Chelsea Crystal Palace leh England defender Marc Guehi chu seng luh leh tumin rilru an seng thar leh mek.
Blues hian kum 24 mi, Guehi hi kum 2021 khan Palace hnenah hian £ maktaduai 18-a an hralh tawh ni mah se an tlarhnung tiphuitu tura an tinzawn zingah an dah a. Palace hnena an hralh hun lai hi tuna Chelsea neitu ni ta, Todd Boehly leh Clearlake Capital ten club an lei hma kha a ni.
Palace hian Chelsea atangin official taka dawrna erawh an la dawng lo va; mahse, Guehi-a aiawhte chuan a club hlui hian an ngaihven tih an sawi tawh thung.
Guehi-a hian thla 18 daih contract a la nei a, Palace a zawm tirha kum nga daih a ziak kha a la kal zel a ni.
Chelsea hian tun January-ah emaw, nipui bazar inhawn leh hunah emaw hian central defender lak ngei tumin ngaihtuahna an seng mek a ni.
Tun hnaiah Wesley Fofana chu a chawntha a tihnat avangin an chân a, manager Enzo Maresca chuan tun season-ah a inlan theih a beisei tawh lo.
Hetih lai hian Fofana hi beisei aia hmaah a inkhelh theih a rinawm nia sawi a awm bawk.
Benoit Badiashile lak February thla hma chu chhawr theih a ni dawn rih lo bawk.
Guehi hi Chelsea tan vawi hnih chiah a inlan hman a, kum 2019 khan niin EFL Cup-ah ve ve a ni a. Loan-in season khat leh a chanve chhung Championship-ah Swansea-ah kalin Palace a zawm zui a ni.
England tan vawi 22 a khel tawh a. Nipui lai khan Newcastle chuan lak tumin vawi li lai dawr mah se Palace chuan an hnar vek a, a hnuhnung ber phei chu £ maktaduai 65 hu zeta dawrna a ni.
Chelsea hi tlarhnunga an indaih loh deuh avangin Palace-a loan-a khel, Trevoh Chalobah an ko kir a, Argentinian defender Aaron Anselmino pawh Boca Juniors atangin an ko haw bawk.