Aizawl: Inrinni khan East Tuipui bialtu MLA Ramthanmawia’n Vanzau Public Playground a hawng.
Vanzau Public Playground laih zauhna tur hi bialtu MLA Ramthanmawia hian SASCI 2022-2023 hnuaiah Rs nuai 19.4 a ruahman sak a, field laih zauh hna hi sum sanction zaah za hman a nih theih nan contractor hnenah pe lo vin, Vanzau VC ten an kut ken a ni.
Hawnna inkhawmah Ramthanmawia chuan, field puitling tha tak mai Vanzau khuain an neih theihna tura bul lo tantu, bialtu MLA hmasa T Sangkunga hma lo lak tawhna fakin, a chungah lawmthuin, “Ani zarah vawiin niah field puitling tha tak mai kan lo nei ta a ni,” a ti.
Ramthanmawia chuan sorkar inthlak avanga an hma a mite hmachhawp an inchhunzawmsak duh thin lo chu tha a tih loh thu sawiin, “Thil thaah chuan kan hma a mite bul lo tan tawh hi inchhunzawmsak mai thin ila tha ka ti a ni. Tun sorkar tharin kan bial tana hmasawnna hna thawhna tur tam tak SASCI hnuaia kan thunte min tih lapse sak kha rilru a na takzet a ni. Hetiang hi a tuartu chu mipuite an nih zel avangin hun kal zelah chuan chin tawh loh a tha hlein ka hria,” a ti bawk.
Vanzau Playground hawnna hun hi Vanzau G&SA President Zothansanga’n a kai hruai a ni.