Aizawl: Mizoram PWD hnuaia Bairabi khaw chhunga National Highway 154 kaltlang chu Double-Lane kawng ni tura siam meka hmalakna kal mek chungchangte relin Kolasib Bawrhsap Robert C Lalhmangaiha hovin Zirtawpni chawhnu khan an thukhawm.
DC Conference Hall-a thutkhawmah hian kawngpui siam avanga harsatna awm thei hrang hrangte sutkian dan tur pawh ngaihtuah niin; chung zingah chuan vantlang tui lakna khaihlak lo zawnga kawngpui siam hna thawh dan turte, leivung paihna hmun turte, vantlang mipuite nunphung tibuai lo zawng leh mipui hriselna ngaihtuah chunga kawng siam dan turte ngaihtuah ho a ni.
Thutkhawm ah hian Josephine Zonunsangi, SDO(Civil) Bairabi & DUDO, R. Lalduhthlanga, Sr. EE, PWD NHD-III, Lalthanzuala, Sub-Deputy Commissioner Amit Prasad, NIDHI Project Manager, PHED JE (Junior Engineer) leh James K. Lalbiakliana te an tel.