Supply Minister B Lalchhanzova chuan Tripura atanga Sihhmui inkara gas pipeline phum hna thawh mek chu Mizoram tana hmasawnna thlentu a nih dawn avangin mar taka hna thawk a, a hun taka zo thei tura inbuatsaih turin company hotute a hrilh.
Panisagar, Tripura atanga Sihhmui inkara gas pipeline phum mek hi km 127-a thui phum tur a ni dawn a. Tunah hian Mizoram chhung bikah km 17 phum tawh a ni a. Gas pipeline phum hna thawktute hi Indradhanush Gas Grid Limited (IGGL) an ni.
Nilaini chawhnu khan Supply Minister B Lalchhanzova chuan IGGL hotu, David Lalrinfela (Foreman), Mechanical Engineer chu a pisa-ah kawmin gas pipeline phum hna thawh mek chungchang a sawipui a. Minister chuan Mizorama gas pipeline siam mekah sorkarin theihtawp a chhuah thin thu a sawi a. Receiving terminal ram atan Social Impact Assessment tihfel mek a nih thu a sawi.
Supply minister chuan gas pipeline chu Mizoram mipuiten energy security an neihna kawnga thil pawimawh tak anih thu sawiin, “In tinah tui connection anga gas connection herh hawn theih maia kan neihna tur anih bakah, Compressed Natural Gas (CNG) station-te kan neih theihna tur a ni a. Hetah hian CNG hmang motor kan hman theih phah ang a, lirthei hman man pawh a tlawm phah dawn a, mipuiin kan nghakhlel hle a ni,” tiin, IGGL lam chu mar taka hna thawk a, a hun taka thawk zo thei tura inbuatsaih turin a chah bawk.