Aizawl: Chapchar Kut 2025 Organising Committee te chu nimin khan an chairman Lalduhoma, Chief Minister hovin an thukhawm a. Kumin Chapchar Kut hman dan tur an rel a, thupui atan ‘Zo nun ze mawi – Hawihhawmna’ tih chu thlan a ni.
CM Conference Hall-ah thutkhawmah Chapchar Kut hmanna pui ber hi Aizawl lammualah March 6 leh 7-ah neih tura duan a ni. March 6 ni hian Home Minister K. Sapdanga chu khuallian a ni ang a, a tuk March 7-ah Chief Minister Lalduhoma khuallian a ni ang. Kut denchhen programme pawimawh dang te erawh chu March ni 3 atanga kalpui tan tur a ni.
March 3-ah Chapchar Kut pual Tlan (Kut Run) buatsaih a ni ang a, March 4-ah Flower Show leh Painting & Exhibition Show kalpui tan a ni ang.
March 5-ah Chapchar Kut heritage tour buatsaih a ni ang a, he mi ni vek hian Falkawn Zokhuaah Mizo Pi leh pute Nun (Mizo Typical Life) Demonstration buatsaih tan a ni ang. A tuk Match 6-ah pawh neih chhunzawm tur a ni. March 5-ah vek hian Kut pual Handloom, Textile & Handicraft Exhibition and Food Processing & Food Court hawn a ni ang a, exhibition & food court hian March 7 thleng a awh ang.
Thutkhawmah hian Chapchar Kut hlawhtling leh hlimawm buatsaih a nih theih nana tihtur pawimawh te relin, mawhphurtu turte pawh an inruat a, senso tur te pawh an rel bawk.
Chapchar Kut hmanna tur sum hi tun hmain a hranin sorkarin budget-ah a dah hrang ngai lo va. Kumin sorkar budget atang khan Rs. nuai 100 dah tan a ni. Hei hian mamawh zawng zawng a daih dawn loh avangin sum hmuh belh theihna tur chi pawh thutkhawmah hian an sawiho nghal bawk.