Champion lai, Jannik Sinner chuan bul tan tha tawk lo mah se World No. 173 Tristan Schoolkate lakah hnehna a chang ta tho va, Australian Open nomawi a kawl lai humhim turin kawng dik a zawh zel.
Nikuma Melbourne-a Grand Slam nomawi hmasa ber latu, Sinner-a hian October-a Shanghai Masters hnua set a la hloh miah loh chu a hloh ve ta.
Australian Schoolkate hian Rod Laver Arena-ah set hmasa berah 5-4-a hma hruaiin Sinner-a’n set 29 a lak zawn tawh a titawp.
Wildcard hmanga inlan hian champion tura rinkai ber, Sinner-a hi a dang tluan thei ta chuang lo va, 4-6 6-4 6-1 6-3-a tlawmin champion lai hian 3rd round a lut.
Kum 23 mi hi Novak Djokovic-a’n kum 2008 leh 2009-a a zawna Australian Open mipa maltana vawi kua chak leh thei hmasa ber a ni.
Nomawi humhim tum dinhmuna din chu a danglam em tih zawhna chu Sinner hian, “A danglam a; mahse, court chhung leh pawnah thil duhawm tak tak a thleng a, a nuam ka ti a. Danglam mah se humhim theihna hun tha ka neiin ka hria,” tiin a chhang.
“Kawng thui tak zawh tur a la awm a, ni tin kal a ngai a, vawiina ka khelh dan atangin hma ka sawn zel thei tih ka hmu,” a ti.
Sinner hi March thlaa doping test vawi hnih a paltlang loh hnua Australian Open-a a inlan lehna hmasa ber a ni a. A case hi April thlaah Court of Arbitration for Sport (Cas)-ah ngaihtuah that leh a ni ang.
Champion lai hian Inrinni hian 3rd round-ah American Marcos Giron a hmachhawn leh ang.
Ningania inkhel dangah Frances Tiafoe leh Hubert Hurkacz an tlawm.
American 17th seed Tiafoe hi Hungarian Fabian Marozsan lakah 6-7 (3-7) 6-4 3-6 6-4 6-1-in a tlawm a, a hneh loh hi ranking-ah 59-na a ni a. World No. 51 Miomir Kecmanovic pawhin 18th seed Hurkacz chu 6-4 6-4 6-2-in a hneh hlauh bawk.
Joao Fonseca-a pawh Grand Slam-a a inlan hmasak bera beisei phak baka a kal chu a tawp ta bawk a. Brazilian rawlthar hi Italian Lorenzo Sonego lakah set nga chhungin a tlawm.
Kum 18 mi, Carlos Alcaraz-a’n ‘khawvela tha ber tur zinga mi’ tia a lo sawi tawh hian round hmasa berah 9th seed Andrey Rublev chu a lo hneh tawh a. World No. 55 Sonego lakah hian 6-7 (6-8) 6-3 6-1 3-6 6-3-in a tlawm ta thung a ni.
Australian mipuiin an beisei san em em, Alex de Minaur chu straight-set-in American qualifier Tristan Boyer lakah a chak a. 4th seed Taylor Fritz pawhin minute 82 lek chhungin Chilean qualifier Cristian Garin a hneh a, game thum chiah a hloh a ni.
Danish 13th seed Holger Rune chuan Italian Matteo Berrettini chu 7-6 (7-3) 2-6 6-3 7-6 (8-6)-in a hneh bawk.