Aizawl: Mizoram Journalists’ Association, Mamit District chuan nimin khan Annual Conference Vawi -17-na chu MJA Press Club-ah an hmang. Lalbiaknungi, DIPRO chuan khuallian niin a hmanpui.
Khuallian Lalbiaknungi chuan MJA, Mamit District, Annual Conference hmangtute duhsakna hlanin, thudik leh ziktluak puanchhuah kawngah accredited journalist-te an pawimawh tih a sawi a. Chanchinbumi an nihna angin mipui rilru sukthlekah pawimawhna tam tak an nei a, a tha zawnga mipuite rilru hruai turte, sorkar tha tichaka khalh ngilna kawngah an thuziak leh chhuahten awmze thuk tak a neih thu a sawi.
Lalbiaknungi chuan journalist-te chu an thu ziahin nghawng a neih thui theih thu sawiin, hmasawn tum zel a hnathawk tur leh, khawvel changkanna mil zela kal tura mahni theuh inzir thar zel tur leh hriatnate tipung thar zel turin a chah.
MJA Mamit District President Lalhuma pawhin thusawiin, khawvel changkannain a ken tel zingah print media chanchinbuin tun hma angin ngaihhlut a hlawh tawk loh thu a sawi a. Hei hi an district mai nilo, khawvel pum huap pawha chanchinbu mite harsatna tawh a nih rualin, chanchinbumi an nih anga an thuziak leh sawite hi mite’n an la ngaichang tih sawiin, an hriatna leh finna te pawh tihpung zel a, taimak chhuah leh zual turin MJA member-te a chah.
He hun hi Darthanzauva, Vice President chuan kaihruaiin, chawhma lamah MJA Press Club-ah rorel inkhawm an nei a ni.