MZP leh Thangram Indigenous Peoples’ Movement (TIPM) hruaitu chuan nimin khan Chief Minister Lalduhoma chu a pisa-ah an kawm a, Mizoram chhunga Thangram rin luh a nih theih nan hmalakpui turin an ngen.
MZP leh Thangram hruaitute chuan Assam awp chhunga Thangram area, sq. mile 180-a zau hi Mizoramah rin luh a nih theih nan hmalakpui turin an ngen a. Assam awpna hnuaia awm Zofate tan chuan Mizoram chhunga awm hi an hnam leh sakhua tan a him berin an ring tih an sawi.
Assam awp chhung, Thangram (Singla Valley leh Langkaih Valley) hi Zofate chenna a nih avangin hnam lian zawkten an nek reng a. Forest Reserve Area-a Assam sorkarin a ngaih avangin Thangram chhunga Zofate chuan in leh lo din kawngah harsatna nasa tak an tawk thin a. Kawng tam takah harsatna an tawh avangin anmahni unaute awmna Mizoram chhungah Thangram hi rin luh an duh thu hrilhin, a theih ang anga hmalakpui turin chief minister hi an ngen.
Chief minister pawhin Thangram mipuite a hriat reng thu sawiin an hmalaknaah tangkai theihna a neih chuan tlanchhiat a tum loh thu a lo hrilh.
An inkawmnaah hian Lalmuanpuia Punte, MLA, Adviser to Chief Minister (Political) pawh a tel a ni.
MZP-in an tar lan danin TIPM-te chuan kum 2020 atangin Assam awp chhunga Zofate chenna, Thangram area hi hnam lian zawkte laka a him zawk nan leh an hnampuite nen rorelna pakhat hnuaia an awm theih nan Mizoram state hnuaia rih luh phutin hma an la a. Theih ang ang hma la in, India prime minister hnenah pawh memorandum an lo theh lut tawh a. Assam sorkar pawh vawi tam tak an lo sawipui tawh a ni.
MZP nen kawng hrang hranga thawkhoin, Thangram mipuite hmasawn nan leh Zofate inpumkhat nan hmalakho zel an tum thu an sawi bawk.