Aizawl: Aizawl Forest Division leh Association for Environmental Preservation (ASEP) tangkawp chuan Ningani khan Durtlang panna kawngpuiah Durtlang kham leh a chhehvela awm mek state animal, saza leh nungcha dangte humhalh campaign beihpui thlakna hun an hmang.
Bawngkawn Shalom Vengtharah hun hmangin street campaign neih a ni a, Aizawl Forest Division thawktute leh ASEP member bakah he lai vela cheng khawtlang mi thenkhatte an tel a ni.
Campaign-na hun hman bakah hian a chhehvela cheng chhungkuate hnena ngenna lehkha sem nghal a ni bawk.
Durtlang kham leh a chhehvelah hian saza hi eng emaw zat an inthlahpung a. Tun dinhmunah phei chuan an ngam tawhin mihring chenna in bul lawk lawkah hial an inlan ngam tawh a. Tu kutpalh mah an tawh lohna turin theihtawp chhuaha beihpuithlak zel a ni dawn a, dan bawhchhia an awm a nih pawhin ngaihhnathiamna awm lovin dan ang takin kalpui a ni ang.
Aizawl khawpui chhungah ngei state animal leh nungcha dang dang hmuh tur a lo awm leh ta hi a lawmawm tak zet tih Aizawl Forest Division leh ASEP chuan an sawi a. Humhalhtu ni turin mipuite an ngen bawk.