Ruihhlo leh a kaihhnawih hi a reh tak tak maiin a rinawm loh a, a venna leh ti lo tura inzirtirna hi kan uar deuh deuh chu a ngai a ni. Ruihhlo bakah rangkachak leh lunghlu thlengin dan dik lo a tawlhrukna kawng kan ni chho zel ni te hian a hriat a, a sumhrawm chu a na in, vawikhat tihfuh chuan hausak pui lawihna tham a ni nameuh mai, mahse kan fimkhur a, duhamna laka kan inthiarfihlim hram hram zel hi a ngai ta.
Mizote hi thil intihhmuh ching leh midangten an hlawkpui leh tha an tih apiang ti ve thei zel mai kan ni a, hmasawnna kawng tam tak awm phah mahse, chhiatpui fe fe pawh kan lo nei tawh a ni. Ruihhlo leh a kaihhnawih hrang hrangte pawh hi intihhmuhna tha lo tak a ni tih i hre thar fo teh ang u. Chhungkua atang hian inzirtirna tha nei ila, naupang leh thalai zawkte rilruah hian ruihhlo that lohzia leh ruihhlo leh a kaihhnawih hmanga sumdawnna a that lohziate hi inzirtir ngun nise, tuna hma kan la tan lo a nih chuan kan ram chhiat nasat tawhzia hi chhut ngun ngai tak a ni tawh.
Kan ramah hian mahni tharchhuah zu leh a kaihhnawih siamna hmun tam tak a awm a, pantu pawh an tam a, heng mite hi khawtin leh vengtinah an lun thei cher cher hle bawk. Chhungkuaa awmte an nih hlawm avangin an fate emaw, naupang awm ve ten loh theih loh a an tih a ngaih hun a awm a, ruihhlo kaihhnawih an khawih ngun na na na chuan an lo than hnan a, anmahniah sual a nih hriat lohna lehpawikhawih a ni tih inhriat lohna a awm a, a tur ve rengah an ngai thin! Hei hi a tha lo tak zet a, kan inenfiah chu a ngai khawp mai.
Inzirtirna hi kan sawi tak ang khan pek tan mawlh mawlh ngai kan ni tawh a, a mantu lamin nitin ruihhlo man tur an hmu a, kan in man rem thei chuang lo a, a karlakah rangkachak leh a behbawm man tur a awm leh thin bawk. Kan duham luat leh kan ngaihthahna hian min ti dawngdah a, kan hriat lohin kan lo boral telh telh thin. Mizoram hi ram nuam a kan siam zel theih nan ruihhlo leh a kaihhnawih hi i bansan chho ngam zel ang u.