Aizawl: Mizoram Pradesh Congress Committee (MPCC) President Lal Thanzara chuan khaw tam takah hmunphiah hralhna awm loh avangin seng tur pawhin thawhchhuah awmzia a awm lo niin a sawi.
Thawhlehnia Kolasib Block II-in Bairabi Hmar venga CJ Lianchungnunga ina political training leh mi thar lawm luh hun buatsaih hmanpuitu, Congress president chuan Kolasib tlangdunga kuthnathawktute chu an hmunphiah seng hun a intan mek laiin engkim research base veka hma la tura insawiin, thlai thar chi li leina tur pawisa dah tawh nia insawiin, a rate hre sa nia insawiin ZPM sorkarten ruahmanna a la fel loh avangin hmunphuah lak hun leh hralh hun a liam mek tih sawiin, “Khaw tam takah hmunphiah hralhna awm loh avangin seng tur pawhin thawhchhuah awmzia a awm lo va, rilru na takin an mi mal remhriat dan danin an hralh a ni,” a ti.
Nikumah ZPM sorkarin hmunphiah rate a tihchhiatsak vek avangin kuminah a aia chhe zawk dinhmunah an din phah tih sawiin Lal Thanzara chuan, “Hmunphiah hralhna a vawi hnih nan an tihchhiatsak hi kuthnathawktute hmakhaw ngaih lohna lian tak a ni. ZPM sorkar hi kuthnathawktute tan mangchhia, research base leh a rate hre sa nia inzuar chu lal duh avanga inbumna mai a ni tih mipuiin an hmu chiang mek,” tiin, ZPM sorkar chu a intiamna ang ngeiin kuthnathawktute hi minimum support price pe ngei turin sorkar a ngen.
ZPM sorkar kum khatna lekah chhuahsan runpui a thleng tih sawiin Congress president chuan, “Bel keh phuarkhawm sorkar an nih avangin thinlung taka ram tana thawk tura inpawhna leh thawhhona tha an nei lo va, sorkar a keh chhiat lohna chu chief minister, minister leh MLA nihna hmanga lalna leh inhaivur an duh avangin an la keh darh lo mai chauh a ni,” tia sawiin, Mizoram tana sorkar tha siam turin mipuiin Congress an koh avangin chawl hman an nih loh thu a sawi.