- C. Lalthantluangi; 4th Sem., Pol. Science, ICFAI University, Mizoram
Politics kan sawi dawn tak tak hi chuan political ideology te, party ideology leh manifesto te hi kan rilruah a lang hmasa ber thinin a rinawm. Tin, political ideology leh party ideology te hi thil inan duh hmel tak, a huam chinin ang si lo an ni tiin bul in tan phawt teh ang.
Kum 2023 khan R.Vanlalhmangaihsanga chuan “Pawlin emaw, political party ten emaw, ram (country) emaw an inrelbawl dan tura innghah nan an hman thin heng mihring zalenna dah pawimawhna (Liberalism), retheihna umbo leh intluktlanna ngaihpawimawhna (Socialism), chin thin dan phung humhalh duhna (Conservatism) leh a dang te hi Political Ideologies kan tih thin chu a ni” tiin fiah takin alo ziak lang tawh a. Political ideologies bik hi chu ti hian kan hrefiah vek tawhin a rinawm.
Party Ideologies kan tihah erawh chuan political party hrang hrang ten an kal dan phung tur te, an party rinna leh hmalak zel dan tur an duan lawk te hi a ni a. Mizoram bikah chuan Kristian ram kan nih avangin party ideology te pawh kan sakhaw rinna leh kan hnam kalphung (culture) mil leh behchhan te a siam a ni fo thin.Tunlai Mizoram political party langsar zual heng Mizo National Front (MNF), Indian National Congress (INC), Zoram People’s Movement (ZPM) leh Bharatiya Janata Party (BJP) ah te thlur bing dawn ta ila. Heng party hrang hrang te pawh hian an ideology te hi Mizoramin zalenna a sual chhuah dan atang te, kan hnam nunphung leh kan ram a lo intodelh zel nana khalh kal tumna leh an tum dan behchhan tein an siam thin a ni.
Heng an ideology te hian party te mawhphurhna pawimawh tak tak mahni ram leh hnam venhim kawngah te, mahni intodelh kawngah te, hnam inpumkhatnaah leh khawtlang hmasawnnaah te nghawng lian tak a nei a ni. Tin, party ideologies leh manifesto te hi thil kal kawp tlat an ni a, ideology te hian thlir lawk thiamna (vision) a pe a, manifesto te erawh chuan chet zui dan tur ruahmanna (actionable plan) a pe a ni. Inthlan zawhah party pakhatin an manifesto an kalpui dan chu an ideology nen an enfiah fo thin. He inzawmna hian mipui rinna leh party hmalam hun tur a nghawng thei bawk. Kan political party te ideology hi kan ram politics in her danglam dan te, mipuite duhdan leh tualchhung hmasawnna nghawng thei thilte hriatthiamna atan a pawimawh em em a ni.
- Mizoram political party hrang hrang leh an ideologies :
Mizoram a kan political party langsar zual MNF, INC, ZPM leh BJP te hian an party thil
tum leh in nghahna tichiang turin ideologies an nei theuh a, chip chiar zawkin han tarlan tum ta ila:
- Mizo National Front (MNF) : MNF hi mizo te din party niin ram leh hnam humhalh kawngah leh zalenna sual chhuah kawngah sulsutu an ni. Kum 1961-a din, MNF party hian Mizo Nationalist Movement ah hmun pawimawh tak a chang a, Mizoram kan intodelhna kawngah leh mahnia rorel tura dikna chanvo kan neihte humhalh tumin hma an la thin a, Mizo te tan chuan a ngaihhlut awm viau a ni.
- Indian National Congress (INC) : Tun hma leh tun thleng pawha Mizorama langsar, Indian National Congress (INC) hian hnam ngaihdan zau zawk,mipuite rorelna leh sakhaw zalenna chawisang hmangin hna an thawk thung a ni. State chhungah vawi tam tak sorkarna an siam tawh a, INC hian ram pum huap thil thlirna hnuaiah tualchhung thil hrang hrang ngaihtuah a tum a, politics hmasawnna leh khawtlang nun tihchangtlunna lam an ngai pawimawh hle a ni.
- Bharatiya Janata Party (BJP) : BJP hi Mizoram politics-ah hian party tenau tak nimah se, an thuneihna zau zawka tihpun an tum tlat a. An party ideologies hian ram hmangaihna leh ram hmasawnna lam te an dah pawimawh ber a, mahni intodelhna leh mahni a rorel tura dikna chanvo neih te hmangin mipui tam tak an hip khawm nachungin Mizoram hi Kristian tamna ram leh mahni hnam din party awn zawk ram kan nih avangin harsatna tam tak erawh an tawkin a rinawm.
- Zoram People’s Movement (ZPM) : ZPM hi kum 2017-a din thar deuh niin Mizoram political party naupang ber pawl nimahse mipuiteah thawm an nei lian hle a. ZPM hian rorelna tha leh mi zawng zawng huapzo hmasawnna an ngaipawimawh hle. Tin, mipuite tana langtlang sorkar nih an tum nghet hle bawk. Hei bakah tualchhung hmasawnna leh mipui duhthusamte an ngaihpawimawhsakna hian abikin Mizoram zirna in hrang hrangah ZPM hming hi a ti ri nasa hle a ni.
- MLA Election thlir letna :
Mizoram politics huam chhung inthlan zawng zawnga boruak neilian ber thin chu MLA election hi a ni a, constituency tin ah party hrang hrang candidate leh an party worker ten an vawn lai party te an tlin ngei theih nan tan an la nasa thin hle tih chu kan hre theuh awm e. Chumaibakah, political party tin ten manifesto tha tak tak neiin mipuite zingah pawh a tam thei ang ber hrilh darh turin leh vote dilin ke an pen chhuak suau suau thin bawk.
Mi fing leh thusawi thiam tak tak ten an party hminga an mamawh tak mai tihsak turin mipuite an han tiam tak tak hi chu, tawng mawi lo ni lo se – thingtlang kil khawra cheng ni tin ei khawp hmu ve tawk tawk te tan chuan a thlakhlelhawm tur zia hi kan ngaihtuah thiam pha kher lo hial zawk awm e! An mamawh tak an hmuhna tur chuan an vote lo pek mai kha chu thil harsa a nih a rinawm loh. Nimahsela, kha an vote ngei kha a tlin hnuah an thil tiam kha an pe leh thei vek si lo! Ziak leh chhiar thiam ve tawk tawk te tan phei chuan vote kan thlak hi kan dikna chanvo leh khua leh tui tha kan nihna a ni tih lam ai chuan politics-a inhnamhnawih ve tawh loh law law an thlan duh hmel zawk riau.
Hetiang vang pakhat te pawh hi a nimahna, kan voting percentage a tlak hniam tak hlek hlek zel ni. Election Commission of India-in a a tarlan danin kum 2013 MLA inthlanah Mizoram voting percentage chu 80.82% niin 2018 ah 80.55% a ni a. Tun inthlan hnuhnung ber 2023 khan 80.43% a ni thung. Kawng thenkhatah erawh kan political party te dem vek theih an ni bik hauh lo a, keini mipuite pawh kan changkang ve tawh viau nachungin thil phut leh a thlawna dawn tum kan la ngah lutuk te hi ram hmasawn zelna daltu lian tak a tling thei viau bawk. Tin, Mizoramah chuan kawng tha hi khawi khua leh veng pawhin kan mamawh ber pawl a ni theuh ti ila kan sawi sual tam in ka ring lo. Hei vang te pawh hi a ni tak ang kan political party te hian an manifesto -ah kawng siam a that tih an telh chawk ni!
Kum eng emaw zat kawng chhia lo buaipui tawh state ni mah ila, kawng tha reng reng kan nei thei leh chuang hauh lo lai te hi a ni buaithlak chu. A chang chuan kan political party hrang hrang te hian an ideology te leh manifesto tihlawhtlin theih tur ngaihtuah ai mahin election-a an tlingpui theih tur ideology leh manifesto an ngaihtuah thin zawk emaw ni a tih theih hial thin hi a pawi hle a ni.
- Sorkar tha
Thupui tawpna atan chuan sorkar tha, mi rethei leh hausa, mi khawsa thei leh a hniam ber te thlenga hmasawnna kan hmuh theihna sorkar hi Mizoram hian kan mamawh hle a ni. Sorkar lai nawr kaltu tur atan opposition party kan nei te hi a lawmawm hle. Amaherawhchu, kan opposition party te hian an tih tur dik tak an ti thin em tih hi zawhna pawimawh tak a ni. Hnathawh that leh hmasawnna neih tam kawnga sorkar el lo a, sawiselna leh demna rawngkai ringawta an in er a nih chuan – chu chu kan ram thanmawhbawk a ni ang. Tin, opposition an nih laia thil tha leh thil dik tam tak an sawichhuah thin te hi an sorkar hun alo thlen pawhin a tak ngeiin lan tir zel thei thin se kan ram hian hma a sawn chak leh zual ngei ang.
- Sorkar mek party leh opposition party te hian ram tan hna an thawh dun thiam a pawimawh hle a ni.
Zoram thanmawhbawkte zinga lian ber pakhat leh chu sorkarna chelh mek party te hnathawh zawh hman loh term thar intlan hunin alo nang ching thin hi a ni. Sorkarna chelh tu party thar an lo awmin sorkar hmasa hnathawh tam zawk chu chhunzawm leh mai ta loin a thar an han duang leh thin a. Kan ram hruaitu political party hrang hrang leader te pawh hian a bul tantu nih a pawimawh ang bawkin a tawp khar theitu nih pawh hi a hlu hle a ni tih hi hre thar leh se a va lawmawm dawn em!
Tin, sorkarin a enkawl tur zawk a ram mipuite min um pha lo fo te hi a pawi hle a ni. Tun hnaia langsar deuh (tun hma te pawh a ni ang) tawitein entirna pe ila – Zirlai ten an scholarship dilna tur sum leh tha leh senso tur an buaipui fel vek thei a, an beisei leh mamawh ber a scholarship a erawh a hun tak a sem a ni thei thin lo leh zirlaite hnena sem kim tura hun a duh rei thin zia te hi aw! A dang lehah chuan changkanna leh hmasawnnain a ken tel te zing a mi chu lirthei hi a ni. Tunlai chhanah, a bikin khawpuiah chhungkaw tam zawkin lirthei an nei fur tawh a. Tuialhthei thunna tur pawisa pawh an nei, chu mai bakah a tuialhthei dah khawmna turin mimalin gas station (petrol pump) a la siam thei leh zel a. Sorkar enkawl kawng (road) chhiat avangin kan mamawh hun takah tuialhthei ber erawh kan la thei lo fo thin te hi a pawi hle a ni!
A tawp ber atan chuan amah Pu James Dokhuma tawngkam hawh ila, ”He ram kan ram hi mi zawng zawngin kan intawm awm chhun a ni a, sorkarna chelh lo tu Party chuan sorkar chu a sawisel a ni thei e, mahse kan ram hi chu dim rawh se” tih hi a tawp khar nan ka’n hmang ang e.