Kum sang tam tak kaltaa Biblein a lo sawi, Thufingte 17:22 “Thinlung kha chuan ruh a tiro,” tih leh kum zabi 19na vel laia Zawlnei Ellen G. White sawi, “Lungawi lohna leh vuivainate hi natna hlauhawm anga inkaichhawn theih thil a ni,” (4T 545) tih hi tunlai science hian a dikzia an rawn sawi ve ta zel hi a makin a ropui a ni.
Mi thiamte lo zir tawhna report rinawm tawk tak atanga an hmuh danin thinrim bur bur thin te zingah a let nga-in lungphu chawl a thi an tam a, Dr. Chris Aiken sawi danin, thinrim em em a darkar hnih kan awm chhung hian a let hnihin lungphu chawla thihna a sang a ti. Chutiang bawkin darkar hnih chhung thinrim ang buan buan hian let thumin, thluaka thisen dawt chat, zeng natna (stroke) hi a tisang an ti bawk.
Engtinnge thinrimna chuan lung a khawih pawi dan chu?
Thinrim em em maia kan han so san bual bual hian kan taksa khawl hi reiloteah a lo danglam vek thei a. Kan taksaa hormone tha lo, stress hormone (cortisone) antih hi a lo chhuak vat ngei ngei a. Chu chuan marphu a rawn ti sang vak vaka, BP a rawn sang thut thei a, chu chuan kan lunga thisen dawt a tichat theia, tichuan lungphu chawl (heart attack) a rawn siam thei a ni. Tin, BP lo sang khan thluaka thisen dawt a ti chat thei a, chu chuan zeng (stroke) a thlen thei bawk a ni. Chutih rual chuan kan lung kha a thawk rim lutuk theiin a chau thei a, lungna vei a awl bik.
He stress hormone hian a rawn ken tel pakhat chu, Dr. Murray Mittleman sawi dan chuan, kan thisen kal vel hi a hnang tawk leh pan (thin) tawk chauha tluang taka a kal theihna tura control tu, platelets antih hi a khawih danglam thei a, chu chuan thisen a ti hnang lutuk thei tih a sawi. Washington State University-a kum 50 chunglam an enchhinnaa an hmuh chhuah chu thinrimna lanchhuah tira, ang buan buan thinte zingah an lunga thisen dawt (coronary arteries) ah calcium deposit a tam a chu chuan lungphu chawla thihna a thlen thei tih an hmu. He stress hormone hian zunthlum vei theihna leh thil thalo dang dang ken tel a nei a, hetah chuan kan sawi tel lovang a.
Heng research an tih na lama an hmuh chhuah pakhat chu thinrima ang buan buan ching lem lo va, thinrimna vawng reng mai, kum tamtak kal ta a mi thenkhat ten an chunga an thiltih diklo ni a an hriat theihnghilh thei miah lo va, sawi chhuak fote zingah te zingah pawh hian a chunga kan han sawi ang khian lungna leh leh lungphu chawl a thi an tam bik an ti bawk. Lung hriselna khawih pawi thei leh chu, tuarna, lusun manganna emaw hlauhna (lost) hrang hrang, in leh lo channa emaw, nula leh tlangval ten an hmangaih em em te an sun emaw, nupui pasal dang neih san vang emaw a tuar thiam lo zual bikte zingah hian lungphu tha lo leh natna hrang hrang nei an tam bik an ti bawk. Ohio State University a an zirnaah chuan thinrim reng mite zingah natna hrik dotu cells thenkhat hi a hniam bik tih an hmu bawk. Chuti anih chuan tlang hrileng kan tuarlo hma bik dawn tihna a ni.
Kawng leh lamah chuan kan chunga nasa taka thiltisualtute ngaidam a, hmangaihna leh ngilneihna an chunga lantir thei mi te leh tuarna rapthlak tak pawh la zam thei mite chu an hlim bikin a hrisel bik an ti bawk. Ngaihdam theihnaah hian hriselna tluanghrui thuk takin a inthlung tlat a ni. Ziaktu pakhat chuan, “Ngaihdamna hi a chak em em a, rilru natna zawng zawng a ti dam thei. Tin, kan chunga nasa taka thiltisualtute kan ngaidam chuan phurrit lian tak bo ang huai hian a awm thei a, kan ngaihdama te kha hmangaih takin kan va en thei a ni,” an ti bawk. Naihdam theihna hian kan thlarau nun a tichaka, chu chuan rilru hlimna a thlen a, Biblein, “Thinlung hlim hi damdawi tha tak a ni,” a ti a. Scientists ho hian kan rilru a hlim chuan kan thluak atangin natna vengtu blood cells thenkhat a rawn chhuah tam tira, chu chuan kan immune system (natna vengtu) a ti chak a ni an ti. Tin, mi hlim theite an hrisel bikin cancer leh natna khirhkhan vei an tlem bik an ti bawk. Bible dik zia hi tunlai science lam hian an rawn fiah zel mai hi a makin a ropui a ni. Lalpa chu fakin awm rawh se. Tlang hrileng, hlauhawm tak tak lakah pawh immune system (natna vengtu) chak tak kan neih chuan min hneh thei lovang. Chu chu mitin tih theih a ni. Rilru hlim leh Pathian leh thenawm khawvengte nen inrem taka kan awm hi a va pawimawh tak em!
Ngaihdamna chungchang, Lal Isuan Petera a ngaidamna thiltihtheihzia kha a ropui hle. Zirtir Petera, Isua kianga kum thum leh a chanve tawp awm ve a, a thilmak tamtak tihte leh, Lazara thi a kaihthawh lai ngei hmutu khan ‘hemi hi ka hrelo ve’ an tih khan Chhandamtu rilru chu a va na dawn em! Mahse ngaihdamna thiltihtheihna chuan hna a thawk ta a, Chhandamtu chuan Petera a han en a, A hmel zaidam tak leh ngilnei, ngaihdamna leh hmangaihnaa khat, thinrimna hmel reng reng lang lo chu Peteran an hmuh khan, kha ‘ngaihdamna thiltihtheihna’ khan a fan chhuak chiang hle. Kha ngaihdamna avang khan Petera tawpna chu kan hre theuh a. Kha ngaihdamna kha awm lo se, zirtirte chanchin hi a danglam dan tur chu kan suangtuah thiam theuh ang.
Ngaihdamna rah ropui leh mawi tak dang leh chu Pathianin Lal Davida a ngaihdamna kha a ni. Davida kha, mi nupui a chhuh sak chungchangah, Pathianin ngaidam thei lovin lo tihlum ta se la, Sam bu leh Bible chanchin hi a va danglam nasa dawn em! Thihna kotlangah meuh pawh, Sam-phuahtu hian Pathian hmangaihna, ngilneihna te, rinawmna te, makna te leh felna te chu a hre reng a. Pathian hmangaihna chu a phat chuang lo va, Pathian chu atan chuan chhandamna a ni tih a hre reng a ni. Sam 23:5ah Davidan a hmelmate chunga a thiltih dan ngaihnawm tak min hrilh. “Mi dotute mit hmuhah ka hmaah hian dawhkan I buatsaih thin a, ka noah hian a liam reng e.” “Ama tana Pathianin a thil tih sakte chu, a hmelmate ai chuan ngaihtuah thupuiah a nei zawk a. Tichuan ama tana dawhkan buatsaih sak turin Pathian chu a lo awm thin a ni. Mi malin kan nunah kan tawng tawh ang. Kan tan thihna luikawr thim ang a kan ngaih hi Ama min hruaina a lo ni chawk. Pathianin tawrhna meipui, mei hrehawmin a mite a fiah fo. Kristian nungchang, rangkachak atanga tuiek chu rawhtuina mei saah a paih chhuak thin a. Isuan fiahna chu a thlir reng a; A hmangaihna eng phet let theitu rangkachak hli chu tihthianghlim a ngai a ni tih a hria a ni.” -Thlahtu Bulte Leh Zawlneite p.111
Heng Bible changte hian kan article hi lo khar ila. “Hlimna kim chu I bulah a awm a, I dinglamah chatuan nawmna a awm bawk si a.” Sam 16:11 “Lungchhiate chu a thlamuan a, an hliamte pawh a tihdamsak thin.” Sam 147:3 “Thinrim ban san ula thil sual ti suh u, ni tlak thleng thlengin thinrim suh.” Ephesi 4:26
Chhiartu Duhtakte,
Min lo chhiar sak avangin kan lawm e. Lalpa’n malsawmna tamtakin vur che u rawh se.
In rawngbawlpui,
NuHoTawngtai Group.