Inthlang rama awm kan nih miau avangin kan aiawha roreltu turte kan thlanchhuah thin a ngai a, tualchhung atanga sorkar thlenga roreltute thlangchhuak thin pawh keimahni bawk kan ni.
Democracy rama awm kan nih avangin kan hlu a, kan zalen a, kan zalenna hmangin kan mi duh tak vote kan pe thei bawk. Zalenna hmang thiam tur hian mitin kan pawimawh a, therhlo leh a vel laka fihlim reng pawh kan tum tur a ni.
Naktip maiah kan khawtlang rorelna min kaihruaitu tur VC/LC kan thlang leh dawn a, political party tinte pawhin mi thiam leh tha tak tak, itawm tak tak an thehchhuak hlawmin, sorkar-na siam ngei tumin theihtawp an chhuah hlawm.
Hetiang hunah tak hian fimkhur a ngai zual a, thenkhat chuan party rilru na tak pu chunga campaign an hrat bakah, midangte that lohna lai sawichhuahsak phet an chak tawh thin. Chu chu inthlan ken tel ni tlata hriatna an pai tel duh fu bawk. Thil tha lo tak a ni.
Mi pangngai, mahni chhia leh tha hriatna hmang thiam rual kan nih tawh chuan eng party pawhin candidate tha deuh deuh siam mah se, kan khawtlang tana thahnem ngaitu tur leh hmasawnna hnathawh kawnga a ngaihna hria thlanchhuah thiam mai ila, thawkho thei tur leh rilru leh duh thuhmun nei chunga ke rawn penchhuak vek an nih miau tawh avangin kan khawtlang theuh chu min kaihruai tha thei hlawm em em in a rinawm. I ring ngam ang u.
He kan khawtlang roreltu tur kan thlanchhuahna kawngah pawh hian ngun taka ngaihtuahna hmang chungin, kan chhia leh tha hriatna hlu tak i hmang thiam hlawm teh ang u.