Aizawl: MPCC President Lal Thanzara chuan Mizoram Baptist Kohhran Thalai Pawl (MTKP) inkhawmpui neih laia sorkarin inthlanpui a buatsaih chu mak a tih thu a sawi.
Thawhtannia Lunglei District Congress Committee (LDCC) in Village/Local Council inthlan campaign kharna hun a hmanpuinaah, MPCC President Lal Thanzara chuan, “MTKP inkhawm lian, February ni 13 atanga tan tur a awm tih hre reng chunga, sorkarin inthlanpui hun atan February ni 13 a ruat tlat mai hi a mak hle,” a ti.
Lal Thanzara chuan inkhawmpui leh inthlanpui ni inang chuang lo pawh ti mah se, he inthlanpui hian TKP member leh hruaitu tam tak a nghawng buai ngei ang tih a hriat sa a, inkhawmpui kal chak ve tak tak, mi tam tak chuan MTKP inkhawmpui hi inthlanna lama an buai vangin an chhim ve thei dawn lo tih a chiang tih sawiin, hetiang hun khera inthlan buatsaih lo tur hian chhim lam Minister leh MLA te hian awka an nei ve lo em ni tih chu a zawhna a nih thu a sawi.
MNF leh Congress an sorkar laiin mipuiin an bawh luai luai thin laia, tuna sorkarin kum khat emaw chauh an tlin laia an chhuahsan luai luai thung hi thil mak tak a ni tih sawiin MPCC president chuan, “Tuna kan sorkar chuan mipuiah thil tha tam tak – thlai thar lei, hmunphiah lei leh thil dangte an tiam a, a takin engmah an tih leh theih si loh avangin, mi beidawng tam tak an siam mek a ni,” a ti.
Central BJP sorkarna hnuaiah Kristian missionary-te an chep zel tih sawiin Lal Thanzara chuan, “Langsar takin missionary ang pawha an awm ngam tawh loh laia, BJP thawhpuitu MNF leh ZPM party a awm hi Mizo Kristiante tan hian a inhmeh em tih kan ngaihtuah a ngai. Politics hi kan ram, kan hnam, kan sakhaw himna tur a ni a, dawt leh thudik chanve inhrilhna hmun a ni lo,” tiin, village/local council inthlan lo awm turah khawtlang hmasawn tur hruaitu tha leh belhchian dawl neih a ngai tih ngaihtuah chungin, Congress party candidate te vote vek turin mipui a sawm.
He hunah hian LDCC President R Lalnunthara pawhin thu a sawi a ni.