Defender Ruben Dias chuan Manchester City-in ‘hlawhtlinna pui tak’ an la chan theih thu leh ‘season harsa tak’ an hman chu an inchhan chhuak leh thei tih a sawi.
Pep Guardiola-a team hian group stage-a 22-na an nih hnuah champion lai, Real Madrid chu Champions League play-off thawh khatnaah Thawhlehni zan hian an hmachhawn dawn.
Thawh hniha inkhelah an chak chuan City hi round of 16 an lut thei dawn a, Atletico Madrid emaw, Bayer Leverkusen emaw an hmachhawn thei ang.
Premier League-ah pawh an che tha tawk lo va, pangana niin hmahruaitu, Liverpool chu point 15 laiin an phak lo mek.
“He hmuna kan season khirh ber a ni chiang a; mahse, kan hun khirh takah pawh hian eng emaw tak kan la hlawh chhuak thei ang tih chiang takin ka ring a ni,” tiin Portugal centre-back, City vice-captain pakhat ni bawk chuan a sawi.
“Eng anga hautak nge ni dawn tih chu kan hria a; mahse, dressing room-ah ralthuam tha tak kan nei a. A hman dan tur dik takin kan hmang dawn a ni,” a ti.
Tun tum hi Champions League-a season li a zawn leh season ruka a vawi nga nan City-in knockout stage-a Madrid an hmachhawnna tur a ni tawh.
Nikum khan Real hian quarterfinal-ah penalty petah hnehin Carlo Ancelotti-a team hi a vawi 15-na atan an champion zui.
A hmaa vawi hnih an inkhel tawhah pawh an inhnehtawk ve ve a, Guardiola chuan tun lai Champions League-a inel lian ber niin a sawi nghe nghe.
Tun hi Madrid player-ten an khelhpui, Vinicius Jr aia Rodri-a hnena khawvela player tha ber, Ballon D’Or a dawn an duh lohna lantira a hlanna inkhawm an tel loh hnua an inhmachhawn hmasak ber tur a ni bawk.
City hi hetianga mawi lo taka Real player-te an awm avang hian an lungawi lo hle nghe nghe.
Hetih lai hian Dias-a chuan Rodri-a ber khan Paris-a chawimawina a dawn lai khan Real an tel leh tel loh lamah engmah buaina a neih ve loh thu a sawi.
“Min hre thiam ula, kha thil kha second khat pawh ka la ngaihtuah lo,” tiin kum 27 mi hian a sawi bawk.
“Rodri ka lawmpui a. Vinicius pawhin kum tha tak a hmang a, a phu em em bawk. Tun hmaa Lionel Messi leh Cristiano Ronaldo inel ang deuhvah khan ka ngai mai,” a ti.