Ruben Amorim chuan Roy Keane a chhang let a, Manchester United captain hlui ngaihdan ai chuan ama ngaihdan chu a pawimawh daih zawk tih a sawi.
Keane chuan tun hnaiah Manchester United captain Bruno Fernandes a sawi chhe nasa hle a. Kum 53 mi hian inkhelh thiamna ringawt chu a tawk loh thu sawiin, Everton nen 2-2 a an inhneh tuma free kick a pet goal a lawm pawh Keane hian a sawisel nasa hle.
Keane bakah Ian Wright, Gary Neville leh Jill Scott te chuan Manchester United in 3-2 a Ipswich an hneh tum khan United dinhmun an sawiho a, hetah hian Keane chu a ang chhuak a. Ian Wright chuan Fernandes chu chhanin Portuguese star hi awm lo phei se United chu relegation zone-ah an awm a rin thu a sawi a ni.
Manchester United boss Amorim chuan Keane hi a chhang let a, “Bruno hi kan tan a tangkai em em a, ka tan ngat phei chuan tangkai tak a ni. Hun harsa tak karah pawh a khel tha viau zel a, a mawhphurhna a hlen zel a ni,” a ti.
“Captain nih chuan mawhphurhna a sang a, a chang chuan khelhpuite sawisel a tul thin. Tu pawhin ngaihdan neih theih vek a ni a, Roy Keane pawhin ngaihdan a nei a, Bruno leh team te chungchangah beiseina sang tak a nei a, hei hi thil nih loh dan tur pawh a ni lo,” a ti bawk.
A sawi zelnaah, “Ka ngaihdan hi Roy Keane-a ngaihdan aiin a pawimawh daih zawk, a chhan chu coach ka ni miau a,” a ti.
Season kal mekah Fernandes chu Manchester United tana goal thun hnem ber niin goal 10 a thun tawh a ni.